Самарқанд вилоятидаги кластер корхоналари ва фермер хўжаликлари 60 минг гектар майдондан 261,8 минг тонна пахта хомашёси йиғиштириб олиб, йиллик шартнома режасини бажарди.

Жорий йилда вилоятдаги 1791 та фермер хўжалиги маҳаллий эртапишар ва истиқболли навларни ҳамда хориждан келтирилган серҳосил пахта навларини экиб, ҳар қачонгидан мўл ҳосил етиштирди. Жумладан, маҳаллий “Бухоро-102”, “Султон”, “Равнақ-1” навларидан 43-46 центнер ҳосил олдилар.  

Ўтган йили вилоят пахтакорлари Хитойдан келтирилган навлардан гектарига 45-50 центнер ҳосил олган эди. Жорий йилда деҳқонларимиз бу навлар билан ишлаш тажрибаси ошиб, агротехник ишлов бериш, вегетация даврини пухта ўзлаштирди ва натижада 9340 гектар майдонда экилган Хитой пахта навларидан 56 центнердан 65 центнергача ҳосил олишга эришилди.  

Вилоят бўйича умумий ҳосилдорлик ўтган йилдагидан 6,1 центнерга ошиб, 43,7 центнерни ташкил этди.  

Бундай юқори ҳосилдорликка эришишда сув тежовчи технологияларнинг жорий этилгани ҳам муҳим омил бўлди. Чунки бу усулда чопиқ, культивация, қатор олиш, минерал ўғит бериш каби бир нечта жараён самарали ташкил этилди, техника сарф-харажати камайди. Ғўза томчилатиб суғориш орқали озиқлантирилди.  

Шартномадаги ҳосилни йиғим-териб олиш учун 45 кун кифоя бўлди. Мавсумни уюшқоқлик билан ўтказиш учун 720 та терим отряди ташкил этилди. Етиштирилган ҳосилнинг 102,6 минг тоннаси (39 фоизи) қўл меҳнати ёрдамида, 159,2 минг тоннаси (61 фоизи) терим машиналарида йиғиштириб олинди.  

Ғ.ҲАСАНОВ, ЎзА мухбири