Samarqand shahar Nikoh uyida "Adliya ayoli" respublika tanlovining viloyat bosqichi bo‘lib o‘tdi.

Ilk bor tashkil etilgan tanlovning viloyat bosqichida olti nafar soha xodimalari ishtirok etib, belgilangan uch shart asosida g‘oliblik uchun o‘zaro bahslashdi.  

Nafosat malikalari huquqiy savodxonligi, qonunchilikni nechog‘lik o‘zlashtirganligini test sinovi shartida namoyon etdi. Keyingi shartda ular ish faoliyatida duch kelayotgan dolzarb masalalar bo‘yicha taklif va tashabbuslarini himoya qildi. Nihoyat oxirgi shartda xotin-qizlar pazandalik mahoratini ko‘rsatdi.   

Tanlovning yakuniy natijalariga ko‘ra, Samarqand shahar yuridik xizmat ko‘rsatish markazi xodimi Sarvinoz Haydarova birinchi o‘rinni egallab, tanlovning respublika bosqichiga yo‘llanmani qo‘lga kiritdi.

Shuningdek, ishtirokchilar"Eng chaqqon ishtirokchi", "Eng yaxshi pazanda" va "Eng zukko ishtirokchi" yo‘nalishlari bo‘yicha e’tirof etilib, ularga boshqarmaning faxriy yorliq va esdalik sovg‘alari topshirildi. 

Tanlovning viloyat bosqichida g‘oliblikni qo‘lga kiritgan  birinchi o‘rin sohibasi 5 million, ikkinchi o‘rin sohibasi 3 million va uchinchi o‘rin sohibasi 2 million so‘m pul mukofotlariga ega bo‘ldi.

G‘.Hasanov, O‘zA