Шундан келиб чиқиб, мутасаддилар афв этилган фуқароларга зарур ижтимоий-моддий ёрдам кўрсатмоқда.

Ўзбекистон Республикаси Конституцияси қабул қилинганининг 28 йиллик байрами арафасида Президентимиз томонидан имзоланган “Озодликдан маҳрум этиш жазосини ўтаётган, қилмишига чин кўнгилдан пушаймон булган ва тузалиш йўлига қатъий ўтган бир гуруҳ шахсларни афв этиш тўғрисида”ги фармонга кўра, жазони ижро этиш муассасаларида жазо ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ фуқаро афв этилди.  

 Афв қилинганлар орасида Самарқанд вилоятидан 7 нафар фуқаро бор. Уларнинг 5 нафари жазони ўташдан муддатидан илгари озод қилинди, 2 нафарининг озодликдан маҳрум қилиш билан боғлиқ жазо муддати бошқа турдаги жазо чоралари билан алмаштирилди.

 – Йигирма етти ёшга кирдим, - дейди Нуробод туманининг Шўрча қишлоғида яшовчи Шоҳруҳ Қўчқоров. – Тўғри йўлдан адашиб, динни ниқоб қилиб олган кимсаларнинг ёлғон ваъдалари тузоғига тушиб қолдим. Оқибатда 7 йилу 6 ойга озодликдан маҳрум этилгандим. Жазони ўташ жараёнида хатоимни англадим, озодликнинг қанчалик қадрли неъмат эканлигига амин бўлдим. Бугун давлатимиз раҳбарининг фармонига асосан муддатидан олдин озодликка чиқдим. Бунинг учун Президентимиздан беҳад миннатдорман. Ҳаёт оиланг, яқинларинг, тинч ва фаровон жамият билан мазмунли экан. Ҳар бир ота-она ўз фарзанди доим ёнида, бағрида бўлишини истайди. Бугун 4 йил менинг йўлимга кўз тикиб, кунни тунга, тунни кунга улаб яшаган онаизоримнинг бағридаман.  

 Жазони ўташ муассасаларидан озод этилган шахсларнинг жамиятда ўз ўрнини топиши , ҳаётга ижтимоий мослашиши учун ҳокимликлар, тегишли идоралар ҳамда маҳалла фуқаролар йиғинларига зиммасига вазифалар юклатилган. Шундан келиб чиқиб, мутасаддилар афв этилган фуқароларга зарур ижтимоий-моддий ёрдам кўрсатмоқда.

 Ғ.ҲАСАНОВ, ЎзА