Наврўз умумхалқ байрами тадбирлари доирасида бугун Самарқанд вилояти Жомбой туманидаги "Қорақасмоқ" отчопарида улоқ-кўпкари мусобақаси бўлиб ўтди.

Вилоят ҳокимлиги ташаббуси билан ташкил этилган тадбирда юртимизнинг турли ҳудудларидан, шунингдек, Қозоғистон ва Қирғизистондан чавандозлар иштирок этди. Улар бир неча асрлик тарихга эга миллий ўйинда ўзларининг қанчалик эпчил ва чаққонлигини намойиш этди.

Мусобақанинг бош соврини – "Cobalt" автомобили ғаллаороллик Алишер полвонга насиб этди. У ургутлик Муроджон Файзиевнинг Ўрта Осиё чавандозлари тан олган "Бойинг" лақабли оти билан ушбу мукофотга сазовор бўлди.

Ғолиб чавандозга автомашина калитини Самарқанд вилояти ҳокими Э.Турдимов топширди.

Ғ.ҲАСАНОВ, А.ИСРОИЛОВ (сурат), ЎзА