Самарқанд вилояти ҳудудий сайлов комиссиясининг навбатдаги мажлисида Халқ депутатлари Самарқанд вилояти Кенгашига сайлов ўтказувчи сайлов округларини тузиш тўғрисидаги масала кўриб чиқилди.

– Сайлов кодексида маҳаллий Кенгашларга сайлов ўтказиш учун сайлов округлари Халқ депутатлари вилоятлар, Тошкент шаҳар, туман (шаҳар) Кенгашларидаги депутатлик ўринларига тенг миқдорда тузилиши белгиланган, – деди вилоят ҳудудий сайлов комиссияси раиси Х.Муҳаммадиев. – Халқ депутатлари Самарқанд вилояти Кенгашининг яқинда ўтказилган сессиясида аҳоли сонидан келиб чиқиб, вилоят Кенгашида депутатлик ўринлари сони 60 этиб белгиланган. Бизга ҳам ана шу 60 та депутатлик ўрни бўйича сайлов округларини тузиш бўйича тақдимнома келган ва шу асосида округлар тузишимиз лозим.

Мажлисда Халқ депутатлари Самарқанд вилояти Кенгаши депутатлигига сайлов ўтказувчи 60 та сайлов округи тузиш тўғрисида қарор қабул қилинди. Сайлов округларининг рўйхатлари уларнинг чегаралари, сайловчилар сони ва сайлов комиссиялари жойлашадиган бинолар кўрсатилган ҳолда оммавий ахборот воситаларида эълон қилиниши белгиланди.

Ғ.Ҳасанов, ЎзА мухбири