Жаҳон соғлиқни сақлаш ташкилотининг “COVAX” дастури орқали мамлакатимизга АҚШдан келтирилган 3 миллион доза “Moderna” вакцинаси билан юртдошларимизни эмлаш бошланди.

Жумладан, Самарқандга ҳам вакцинадан 275 минг 520 минг доза келтирилиб, вилоятдаги барча эмлаш пунктларига тарқатилди.

Таъкидланишича, ушбу препаратнинг самарадорлиги 94 фоиздан юқори, эмлаш курси бир ой оралиғида қўлланиладиган 2 дозадан иборат. 18 ёшдан юқори ҳамда вакцина олиши мумкин бўлган аҳолининг барча қатлами бошқа ушбу вакцинадан ҳам фойдаланиши мумкин.

Вилоят санитария-эпидемологик осойишталик ва жамоат саломатлиги бошқармаси бошлиғи А.Баҳромовнинг таъкидлашича, кеча ва бугун вилоят бўйича 1400 дан ортиқ фуқаро “Moderna” билан эмланган.

Бугунги кунда вилоят аҳолиси уч турдаги вакцина билан эмланмоқда. Шу пайтгача 475 минг 395 нафар фуқаро вакцинанинг 1-дозасини олган бўлса, 194 минг 219 киши иккинчи ва 83 мингдан ортиқ фуқаро учинчи дозани олган.

Вилоятдаги 384 та эмлаш пунктлари ва 186 та ҳаракатдаги гуруҳлар томонидан кунига 20-22 минг киши вакцина олмоқда. Кейинги кунларда эса эмлаш кўрсаткичи бир мунча ошганлиги кузатилмоқда.

Хусусан, кеча 23 минг киши вакцина олгани ҳолда бугун – 3 август куни 24 минг 248 киши эмланган.

Ғ.ҲАСАНОВ, ЎзА