Бугун ўтказилган ҳокимлик соатида Самарқанд вилояти ҳокими Э.Турдимов вилоятда кейинги ўн кун давомида коронавирус касаллигига чалинганлар сони кўпайганини таъкидлаб, аҳолини карантин қоидаларига қатъий риоя қилиш ва эмлаш жараёнларида фаол қатнашишга даъват этди.

Қайд этилишича, вилоятда жорий йилнинг 1-10 июнь кунлари 233 нафар беморда COVID-19 инфекцияси аниқланган бўлса, 25 июндан 5 июлгача 860 нафар фуқаро касалликка чалинган. Жумладан, Самарқанд шаҳрида 434 нафар, Катақўрғон туманида 74, Катақўрғон шаҳрида 73, Самарқанд туманида 60, Пастдарғомда 43, Пайариқда 38 киши “тождор” вирусга йўлиққан.

5 июль ҳолатида вилоятда 524 нафар бемор (147 нафари касалликнинг симптомсиз енгил шакллари билан уй шароитида, 377 нафари оғир ва ўрта оғир шакли билан стационарда) коронавирусдан даволанмоқда. Тез ёрдам хизматига аҳоли мурожаатлари ҳам кескин кўпайган. Масалан, касаллик кўпайишидан олдин, кунига ўртача 2000 та чақириқ бўлган бўлса, 4 июль куни 3424 та чақириқ қайд этилган (ўтган йилнинг шу кунидаги чақириқлар сони 3218 та бўлган). Чақириқларнинг аксарияти Самарканд шаҳри, Пастдарғом, Жомбой, Пахтачи ва Самарканд туманларига тўғри келмоқда.

Эслатиб ўтамиз, республика махсус комиссиясининг қарорига кўра, ўтган ҳафтадан Самарқанд вилоятида ҳам 18 ёшдан катта бўлган аҳолини коронавирусга қарши ихтиёрий равишда оммавий эмлаш ишлари бошланди. Санитария-эпидемиологик осойишталик ва жамоат саломатлиги хизмати Самарқанд вилояти бошқармасидан маълум қилишларича, 5 июль куни вилоят бўйича 14 минг 300 нафардан ортиқ фуқаро эмланган.

Ғ.ҲАСАНОВ, ЎзА