Ғылымдағы кейінгі мәліметтерге қарағанда, ғаламшарымыздың флорасы мен фаунасының 25 пайызға жуығы адамның әсерінен жойылып кету қаупі бар. Осыған байланысты Өзбекстанда жабайы жануарлардың әртүрлі түрлерін, олардың табиғи тіршілік ету ортасын және көшу жолдарын сақтау және қорғау мақсатында биотехникалық шаралар жүзеге асырылады.

2025 жылғы 24 қараша – 5 желтоқсан аралығында Самарқанд қаласында жойылып кету қаупі төнген жабайы жануарлар мен өсімдіктердің халықаралық саудасы туралы конвенция (CITES) Тараптар конференциясының (COP20) 20-отырысы өтеді. 

Өзбекстан үкіметі осы конференцияның ресми логотипін таныстырды. Логотиптің тұсаукесері Швейцарияның Женева қаласында CITES Тұрақты комитетінің 78-отырысы аясында өтті. Логотипті Өзбекстанның Экология, қоршаған ортаны қорғау және климаттың өзгеруі министрлігі әзірледі.

«COP20 логотипі Өзбекстанның жабайы табиғатты қорғауға деген адалдығының символы болады. Ондағы әрбір элемент өңіріміздің табиғаты, мәдениеті мен тарихы арасындағы тығыз байланысты көрсетеді», – деді Экология министрі Азиз Абдухакимов.

- Өзбекстан биологиялық әртүрлілікті сақтау жөніндегі жаһандық мәселелерді талқылау үшін маңызды алаң болып табылатын COP20-ға қабылдаушы ел болудан үлкен құрмет сезінеді. Біз бұл конференция халықаралық ынтымақтастықты нығайту мен жабайы табиғатты қорғаудың нақты механизмдерін әзірлеу жолындағы маңызды қадам болады деп сенеміз, – деген ол.

Таныстырылған логотипте Өзбекстанның табиғи және мәдени мұрасының бірнеше элементтері бейнеленген: Арқар (тау қойлары) бейнеленген көне петроглиф, дәрілік өсімдіктер, CITES COP20 өтетін тарихи Самарқанд қаласының көрікті жерлері, Орталық Азияның таулы аймақтарында кездесетін арқарлар CITES II қосымшасына енгізілген, ал оларды бейнелейтін тас оюлары – жойылып кету қаупі бар түрлерді сақтау қажеттігін еске салатын белгі. Сонымен қатар, ол табиғат пен өңірдің тарихи мұрасы арасындағы байланысты көрсетеді.

Дәрілік өсімдіктердің гүлдері экожүйедегі өсімдік әлемінің маңызды рөлін және олардың адам денсаулығына тигізетін әсерін бейнелейді.

Самарқанд қаласының көрікті жерлері – бұл Өзбекстанның бай тарихы, мәдениеті және қонақжайлығын көрсететін символ. Самарқанд жай ғана конференция өтетін орын емес, өткен мен болашақты байланыстыратын көпір, мәдени және экологиялық мұраның бірлігі.

Конференция барысында сөз сөйлеген CITES Бас хатшысы Ивонн Игейро ханым Өзбекстан үкіметін сәтті әзірленген логотипімен құттықтады.

«Өзбекстанның ерекше жануарлар әлемі бейнеленген бұл логотип CITES-тің 50 жылдық табиғатты қорғау мұрасын тамаша көрсетеді. Ол COP20 аясында талқыланатын мәселелер мен қабылданатын шешімдердің маңыздылығын айқындайды», – деді ол.

Айта кету керек, Өзбекстан CITES-тің 184-ші тарапы (183 мемлекет + Еуропалық Одақ) болып табылады және жабайы табиғатты қорғау мен сауда саласындағы мүдделі тараптардың кең ауқымды кездесуіне иелік ететін Орталық Азиядағы алғашқы ел.

«Қоршаған ортаны қорғау және «жасыл» экономика жылы» аясында өтетін жаһандық іс-шараға 4000-нан астам қатысушы мен делегат келуі күтілуде.