O‘zbekiston Respublikasi Vazirlar Mahkamasi “2025-2026 yillarda Samarqand shahri va Ishtixon tumanida Bolalar saratoniga qarshi kurashish bo‘yicha O‘zbekiston Respublikasi milliy strategiyasini joriy etish loyihasini bosqichma-bosqich amalga oshirish to‘g‘risida” qaror qabul qildi.

Unga muvofiq, 2025-2026 yillarda Samarqand shahri va Ishtixon tumanida Bolalar saratoniga qarshi kurashish bo‘yicha O‘zbekiston Respublikasi milliy strategiyasini joriy etish loyihasining amalga oshirishning asosiy maqsadlari belgilandi. Ular quydagilardan iborat:

a) xalqaro ekspertlar va Jahon sog‘liqni saqlash tashkiloti ishtirokida tibbiyot xodimlari hamda ota-onalarni saraton kasalliklariga (onkologik va onkogematologik) hushyorligini va bilimlarini oshirish bo‘yicha so‘rovnoma ishlab chiqish; 

b) so‘rovnomani qo‘llash, unga muvofiq tibbiy ko‘rik o‘tkazish hamda birlamchi skrining tartib-qoidalariga o‘qitish orqali tibbiyot xodimlarini onkologik va onkogematologik kasalliklarni erta bosqichlarida aniqlashga o‘rgatish; 

v) so‘rovnomaga asosan saraton kasalligiga gumon qilingan har bir bolani individual yo‘naltirish xaritasini tuzish va bajarilishini nazorat qilish bo‘yicha elektron tizimni yaratish hamda unda sun’iy intellekt texnologiyasidan foydalanishni yo‘lga qo‘yish; 

g) davolash bo‘yicha onkologik kasalliklarga gumon qilingan bolalarni 100 foiz uzluksiz raqamli yo‘naltirish tizimi bilan qamrab olishni joriy etish; 

d) yo‘naltirish xaritasiga asosan: 

tashxislash muddatini onkologik kasalliklar bo‘yicha 14 kungacha, onkogematologik kasalliklar bo‘yicha 4 kungacha qisqartirish;

onkologik va onkogematologik kasallik aniqlangan kundan boshlab 10-20 kunda davolashni boshlash; 

ye) bemor bolalarning raqamli  ma’lumotlar bazasini shakllantirish;

j) birlamchi tibbiy-sanitariya muassasalari, tuman (shahar) markaziy shifoxonasi, hududiy tibbiyot muassasalari shifokorlariga bolalar onkogematologiyasiga oid shubhali alomatlar bo‘yicha doimiy o‘quv-seminarlar tashkil etish orqali ularning bu sohadagi bilim va ko‘nikmalarini oshirib borish. 

Qaror bilan 2025-2026 yillarda Samarqand shahri va Ishtixon tumanida Bolalar saratoniga qarshi kurashish bo‘yicha O‘zbekiston Respublikasi milliy strategiyasini joriy etish loyihasini amalga oshirish bo‘yicha chora-tadbirlar rejasi tasdiqlandi. 

Loyiha quyidagi bosqichlarda amalga oshiriladi: 

a) I boskichda (2025 yil iyun-iyul); 

b) II boskichda (2025 yil iyul-dekabr); 

v) III bosqichda (2026 yil yanvar-dekabr).

O‘zA