2022 жылғы 10 тамызда Өзбекстан Сыртқы істер министрінің м.а. Владимир Норов БҰҰ Бас хатшысының орынбасары, БҰҰ Азия және Тынық мұхиты бойынша Экономикалық және әлеуметтік комиссиясының Атқарушы хатшысы Армида Алисжабанамен онлайн келіссөздер жүргізді.

СІМ мәліметінше, А.Алисжабана республика басшылығының Ауғанстанды аймақтық экономикалық үдерістерге қосу жөніндегі күш-жігері халықаралық қоғамдастықтың жоғары бағасына лайық екенін атап өткен.

Кездесу барысында Өзбекстан мен Азия және Тынық мұхиты үшін экономикалық және әлеуметтік комиссия арасындағы ынтымақтастықтың нақты бағыттары, комиссияның алдағы халықаралық іс-шараларына республика өкілдерінің қатысуы талқыланды.

Президент Шавкат Мирзияевтің Ташкентте БҰҰ қамқорлығымен көлік-коммуникациялық өзара тәуелділікті дамытудың өңірлік орталығын құру туралы бастамасын одан әрі ілгерілетуге және жүзеге асыруға ерекше назар аударылды.

А.Алисжабана осы жылдың қыркүйек айында Самарқандта өтетін Шанхай ынтымақтастық ұйымының саммитіне қатысатынын растады. Осы іс-шара аясында Азия және Тынық мұхиты аймағына арналған Экономикалық және әлеуметтік комиссия мен ШЫҰ арасындағы ынтымақтастық туралы меморандумға қол қою жоспарланған.