Самарқандда 24-25 май кунлари триатлон ва пара триатлон бўйича “World Triathlon Cup Samarkand-2025”, “World Triathlon Para Cup Samarkand-2025” мусобақалари бўлиб ўтади. Бугун мазкур мусобақалар олдидан ташкилотчилар ва машҳур спортчилар иштирокида оммавий ахборот воситалари вакиллари ва кенг жамоатчилик учун матбуот анжумани ўтказилди.

Ўзбекистон триатлон федерацияси масъулларининг маълум қилишича, кетма-кет иккинчи йил Самарқанд мезбонлигида ўтказилаётган мусобақада Буюк Британия, Германия, Франция, Австралия, Белгия, Қирғизистон, Қозоғистон, Австрия, АҚШ, Венгрия, Италия каби 30 дан ортиқ мамлакатдан вакиллар иштирок этади. Жаҳон кубоги мусобақаларини пара спортчилар бошлаб беради. Улар спринт 750 метрга сузиш, 19 километр велосипед пойгаси ва 5 километрга югуриш бўйича баҳслашади. Элит спортчилар учун стандарт 1,5 километр сузиш, 40 километр велосипед ва 10 километр югуриш мусобақалари ўтказилади. Сўнгра тоифага қараб, бир нечта стартлар режалаштирилган. 

[gallery-23541]

Матбуот анжуманида ўтган йил Самарқандда ўтказилган жаҳон кубоги мусобақасида иштирок этган ва юқори натижаларга эришиб келаётган машҳур спортчилар триатлон бўйича Самарқандда ўтказилган жаҳон кубогида 2-ўринни эгаллаган Буюк британиялик Жессика Фуллагар, шу йил Ченгдуда ўтказилган жаҳон кубогида 8-ўринни эгаллаган венгриялик Марта Кропко, ўтган йил Самарқандда ўтказилган жаҳон кубогида 5-ўринни эгаллаган италиялик триатлончи Илариа Зане, Австралиядан Тоби Поверс, триатлон бўйича Осиё кубоги ғолиби Шухан, 2024 йилги ўсмирлар ўртасида жаҳон чемпионати кумуш медали совриндори, Ченгдудаги триатлон бўйича жаҳон кубоги ғолиби америкалик Риз Ваннерсон журналистларни қизиқтирган саволларга жавоб қайтарди.

– Самарқандда иккинчи марта жаҳон кубогида иштирок этяпман, – дейди Буюк британиялик триатлончи Жессика Фуллагар. – Таниш жойда иккинчи марта мусобақада қатнашиш спортчи учун энг яхши афзаллик. Албатта, бу имкониятдан фойдаланиб бу галги мусобақада ғолибликни қўлга киритиш учун ҳаракат қиламан.

Ғ.Ҳасанов, А.Исроилов (сурат), ЎзА мухбирлари