Вьетнамның Хошимин қаласында өткен Халықаралық туризмді дамыту ұйымының (Tourism Promotion Organization for Asia-Pacific Cities – TPO) 12-ассамблеясына Самарқанд облысы делегациясы қатысты.

TPO – Азия-Тынық мұхиты аймағындағы қалалардың туризмін дамыту және ілгерілету мақсатында 2002 жылы Жапонияның Фукуока қаласында құрылған. Ұйым құрылған кезде оған алғаш 25 қала мүше болған, ал 2020 жылға дейін мүше санын 150-ге, 2025 жылға дейін 200-ге және 2030 жылға дейін 400-ге жеткізу көзделген. Осы арқылы қалалардың туризм саласында өзара байланысын нығайтып, бар мүмкіндіктерді бірлесе пайдалану жоспарланған.

2022 жылы Өзбекстанның Оңтүстік Кореядағы елшілігінде TPO ұйымымен ынтымақтастық туралы меморандумға қол қойылған. Сол кездегі кездесуде ұйымның бас хатшысы Өзбекстан қалаларының, әсіресе Самарқандтың туризм әлеуетін жоғары бағалаған.

Бұл жолғы ассамблеяға әлемнің 40-тан астам елінен өкілдер қатысты. Самарқанд облысы туризм басқармасы мен Самарқанд қаласы әкімдігінің жауапты өкілдері де шараға қатысып, ТМД елдерінің қалалары арасынан алғашқы болып Самарқандтың ұйымға мүше болғаны ерекше атап өтілді.

Ассамблея аясында Самарқанд облысының тарихи мұрасы, қайталанбас мәдениеті мен туристік әлеуеті жайлы таныстырылым өтті. Онда делегация өкілдері Самарқандтың әлемдік туризм картасындағы орны, заманауи туристік инфрақұрылымы және шетелдік саяхатшыларға жасалып жатқан жағдайлар жөнінде кеңінен баяндады.

Сонымен қатар, Самарқанд облысы делегациясы Малайзияның Куала-Лумпур, Корея Республикасының Пусан және Индонезияның Джакарта қалалары өкілдерімен екіжақты кездесулер өткізді. Келіссөздер барысында мәдени байланыстарды нығайту, бірлескен туристік жобаларды іске асыру және туристер алмасуын кеңейту мәселелері талқыланды.

Бұл қадам Самарқандтың халықаралық туризм орталығы ретіндегі беделін одан әрі арттырып, аймақтың жаһандық туристік тартымдылығын күшейтеді.