Халқ депутатлари Самарқанд вилояти Кенгашининг бугун ўтказилган тўққизинчи сессиясида Ўзбекистон Республикаси Президентининг коронавирус пандемиясига оид фармон ва қарорлари ижроси юзасидан тадбиркорлик субъектларини қўллаб-қувватлаш ҳамда имтиёзли кредитлар ажратиш борасида кўрилаётган чоралар самарадорлиги юзасидан Марказий банк вилоят бош бошқармаси бошлиғи О.Тўхтаев ҳисобот берди.

Таъкидландики, банклар фаолиятининг бугунги кундаги асосий йўналиши тадбиркорлар фаолиятини молиявий қўллаб-қувватлаш орқали коронавирус пандемиясининг иқтисодиётга бўлган салбий таъсирини юмшатишга қаратилган.

Шу мақсадда жорий йилнинг ўтган даврида вилоятда 4068 та хўжалик юритувчи субъект 1,6 триллион сўм миқдорида молиялаштирилди.

Жумладан, озиқ-овқат соҳасида 277 лойиҳа учун 181 миллиард сўм, оилавий тадбиркорликни қўллаб-қувватлаш мақсадида 3306 лойиҳага 133,7 миллиард сўм, ҳудудларни ижтимоий-иқтисодий ривожлантириш дастурлари доирасида 13 лойиҳага 32,1 миллиард сўм ажратилди.

Бундан ташқари, хорижий кредит линияларини жалб қилиш орқали 352 та лойиҳа юзасидан 44,8 миллион доллар ажратилиб, 1 850 та иш ўрни яратилди.

Бугунги вазиятдан келиб чиқиб тижорат банклари томонидан жорий йилнинг 2 июнь ҳолатида вилоят бўйича 4871 юридик шахснинг 1 триллион 321 миллиард сўмлик кредитлари бўйича тўлов муддатлари 2020 йил 1 октябрга қадар узайтирилди.

Худди шундай, жисмоний шахслар ва якка тартибдаги тадбиркорларга ажратилган 152 мингдан ортиқ кредитлар бўйича ҳам таътиллар берилди.