Қайд этилишича, янги ўқув йилида вилоят халқ таълими бошқармаси тизимидаги 1254 умумий ўрта таълим муассасаси (1246 мактаб, 8 махсус мактаб-интернат) фаолият олиб боради. Шунингдек, 17 баркамол авлод болалар мактаби ва 1 меҳрибонлик уйи мавжуд.

2020-2021 янги ўқув йилида вилоятдаги умумтаълим мактабларининг ўқувчилари сони 732470 нафар бўлиши кутилмоқда.

Янги 2020/2021 ўқув йилида умумтаълим мактабларининг 1-синфларига келиши кутилаётган 78897 нафар болаларга 12 номдаги “Президент совғаси”ни жойларга етказиш ишлари амалга оширилмоқда. 2020 йил 26 август ҳолатига 1-синфга 75177 нафар болалар қабул қилинган.

Бугунги кунда вилоятдаги 1199 та мактаб янги ўқув йилига тайёрланди. Барча умумтаълим муассасаларида дезинфекция ишлари олиб борилмоқда.

– Республика ҳукумати томонидан берилган топшириқ асосида 25-26 август кунлари вилоятнинг барча туман, шаҳарлардаги умумтаълим мактаблари ўқувчиларининг ота-оналари ўртасида сўровнома ўтказилди, – деди С.Усмонов. – Сўровномада вилоят мактабларида таълим оладиган 732 минг 470 нафар ўқувчиларнинг 674530 нафар (92 фоизи) ота-оналари иштирок этди. 466 минг 671 нафар (69 фоиз) ота-она “Мактаблар ўз фаолиятини анъанавий шаклда сентябрь ойидан бошлаши”ни истаса, 207 минг 859 нафари (31 фоизи) бунга қарши эканлигини билдирди.

Шунингдек, сўровда қатнашганларнинг 33 фоизи мактаблар ўз фаолиятини 7 сентябр бошлашини ёқлади. 30 фоиз иштирокчилар 14 сентябрдан, 11 фоизи 2 октябрдан, 25 фоизи пандемия тугаганидан сўнг бошлаш зарурлигини билдирди.

Боласини анъанавий шаклда таълим олиши учун мактабга юборишга тайёр ота-оналар 477 минг 94 нафар (71 фоиз)ни ташкил этган бўлса, 197 минг 436 нафар (29 фоиз) ота-она онлайн таълим тизимини афзал кўрар экан.

Энг муҳими, сўровда қатнашганларнинг 97 фоизи мактабларда тиббий ниқоб тақиш талаб этилган тақдирда фарзанди ниқоб тақишига рози эканлигини баён этган.