Сальвадор қонунчилари конституциявий ислоҳот қабул қилди. Президентлик муддатини чеклаш тугатилиши кўпчилик томонидан қўллаб-қувватланган, амалдаги етакчи Нойиб Букелега раҳбарлик учун яна номаълум муддат номзодини қўйиш имконини беради.

“Arab News” хабар беришича, мазкур тезкор ислоҳот Қонунчилик ассамблеясида етакчининг 57 нафар тарафдори томонидан қабул қилинди. Таклифга фақат мухолифатнинг 3 нафар аъзоси қарши овоз берди.

Букелега қайта сайланиш имконини берадиган мазкур қарор президентлик муддатини беш йилдан олти йилга узайтиради. Шу тариқа у Марказий Америка давлати устидан назоратни мустаҳкамлаб, сайловда иккинчи босқични бекор қилади.

Ўзини “қаттиққўл диктатор” деб эълон қилган Нойиб Букеле 2019 йилдан буён мамлакатни бошқариб келяпти. 2024 йил Олий суд қарори 44 ёшли сиёсатчига иккинчи муддат сайланиш учун конституциявий тақиқни четлаб ўтиш имконинин берди. Натижада у кўпчилик овоз билан қайта сайланди.

Сайловдан кейин Букеле давлат институтлари ва парламент устидан назоратни қўлга олди. Мухолифат томонидан демократияга зид, дея танқид қилинган ўзгариш туфайли мунозара авжига чиқди.

Ҳукмрон “Янги ғоялар” партияси вакили, Ассамблея раҳбари Эрнесто Кастро овозлар саналгандан сўнг “Тарих яратганингиз учун ташаккур, депутатлар”, деди.

– Бугун Сальвадорда демократия ҳалок бўлди... ниқоблар олиб ташланди, – деди мухолиф депутат Марсела Вильяторо парламент йиғилишида.

Қонунчилик, президентлик ва муниципал сайловларни уйғунлаштириш, жорий президентлик муддатини 2029 йилдан бошлаб икки йилга қисқартириш учун овоз берилди. Энди умумий сайлов 2027 йил мартда бўлиб ўтади.

Дарвоқе, Букеле мамлакатда зўравонликни тарихан энг паст даражага туширишга хизмат қилган жараён – жиноий гуруҳларга қарши кескин кампания туфайли қўллаб-қувватланмоқда. Шу билан бирга у халқаро инсон ҳуқуқи ташкилотлари танқидига ҳам нишондир. Бу етакчи инсон ҳуқуқи вакиллари ва ҳукумат танқидчиларига нисбатан босим ўтказиш, ўнлаб журналистлар, фаолларни мамлакатни тарк этишга мажбур қилишда айбланмоқда.

М.Пирматова, ЎзА