Жанубий Кореянинг Куми шаҳрида енгил атлетика бўйича давом этаётган Осиё чемпионатининг тўртинчи кунги баҳсларида Ўзбекистон терма жамоаси аъзоси Сафина Саъдуллаева кумуш медалга сазовор бўлди.

Чемпионатнинг баландликка сакраш дастурида қитъанинг энг кучли енгил атлетикачилари билан кечган муросасиз беллашувлар натижасида ҳамюртимиз 1.86 метр натижа қайд этди ва кумуш медалга сазовор бўлди. Мазкур йўналишда ҳиндистонлик Пужа Пужа 1.89 метр кўрсаткич билан олтин, қозоғистонлик Елизавета Матвеева 1.86 баландликни забт этиб, бронза медалига эга чиқди.

Терма жамоамиз аъзоларидан Ўғилой Норбоева еттикураш дастурида 5461 очко жамғариб тўртинчи, узунликка сакраш дастурида қатнашган Анвар Анваров 7.98 метр билан бешинчи поғонадан жой эгаллади.

Ўзбекистон терма жамоасининг қитъа чемпионатидаги умумий медаллари сони 3 тага етди.

Т.Рўзиев, ЎзА