Таниқли шоир Сафар Оллоёрнинг “Мангулик гули” номли танланган асарларининг III жилди нашрдан чиқди.

Одатда, “Танланган асарлар” ўз номи билан “танланган” бўлиб, ижодкорнинг олдин  ўқувчилар ҳукмига ҳавола қилинган китоблардан саралаб, тартиб берилади. Аммо, Сафар Оллоёр ижодида бу ўзгача кўринишда намоён бўлади. Шоир “Танланган асарлар” туркумидан чиқараётган китобларига ҳали бирор бир китобидан ўрин олмаган янги ижод намуналарини киритмоқда. Бу, табиийки, биринчи навбатда ўқувчини китобга бўлган қизиқишини орттиради. “Танланган асарлар”даги ҳар бир шеър билан китобхон, шоир мухлислари илк бор юзма-юз келади. 

Бу ҳам ўзига хос бир янгилик.

Сафар Оллоёр – новатор ижодкор. Унинг “Танланган асарлар”идаги шеърларни ўқиб, ўзингиз бунга гувоҳ бўласиз. Анъанавий адабиёт, сонетларда кузатилмаган 19 хил туроқда битилган 18 та сонет – гулдаста, 1 жуфт сонетлар қўшгулдастаси, 19 хил туроқда битилган 19 та учшода ва бошқа шеърларининг руҳи ўзгача.

Китобга филология фанлари  бўйича фалсафа фанлари доктори (PhD) Қувончбек Мамиралиев “Давримизнинг новатор шоири Сафар Оллоёр ижодида ажиб фалсафий-тасаввуфий ифода ва жанрий-услубий изланишлар тажаллийси” номли каттагина сўнгсўз ёзган.

“Мангулик гули”га юзланинг, ундан баҳраманд бўлинг.

ЎзА