Матбуот орқали жамиятнинг тафаккурини бошқариш мумкинлигини билган Туркистон жадидлари “Тараққий”, “Шуҳрат”, “Ойина”, “Ал-Ислоҳ” ва шулар каби кўплаб газета-журналларни ташкил этишди.

Булар орасида миллий тараққийпарварларнинг йирик намояндаларидан бири Убайдуллахўжа Асадуллахўжаев томонидан очилган “Садои Туркистон” газетаси ҳам бор эди.

Газетанинг илк сони ҳижрий ҳисоб билан 1332 йил жумодул-аввал ойининг 21-сида (милодий 1914 йил 4 апрелда) жума куни чоп этилиб, унинг биринчи саҳифасида келтирилишича обуна баҳоси Русия фуқаролари (жумладан, туркистонликлар учун ҳам) бир йилга 4 сўм, олти ойга 2 сўм 50 тийин, уч ойлик 1 сўм 50 тийин этиб белгиланган. Шунингдек, хорижликлар учун ҳам обуна нархлари кўрсатилган: йиллик 6 сўм, олти ойлик 3 сўм 50 тийин, газетанинг бир нусхаси эса 5 тийин.

Газета ўз даври учун илғор ғоя ва фикрларни олиб чиқиб, тез орада бутун туркистонликларнинг севимли матбуот нашрига айланади. Газетанинг муҳаррири адвокат бўлгани сабабли, мавжуд мураккаб вазиятни теран ҳис қилган ҳолда, “Шахсий ғаразлардан холи бўлган мактуб ва мақолаларгина газетада босилишини” эслатма сифатида белгилаб қўйганди.

Батафсил:

<iframe width="640" height="420" src="https://www.youtube.com/embed/d7s55YBvVtQ" title="&quot;Sadoi Turkiston&quot; — milliy matbuotimiz durdonasi " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳайё Турдалиева,

Анвархўжа Аҳмедов, ЎзА