Қирғизистон президенти Садир Жапаров Қозоғистонга бўлажак давлат ташрифи арафасида «Казинформ» ахборот агентлигига интервью берди. Қирғизистон президенти ўз интервьюсида ҳокимиятга келиб барча инвесторларни ўз ҳимоясига олганини таъкидлади.

«Ҳокимиятга келиб, мен барча инвесторларни ўз ҳимоямга олдим. Биз давлат бошқарувининг президентлик шаклини танладик. Шу муносабат билан янги Конституция қабул қилинади. Кейин янги қонунлар ишлаб чиқилади, янги парламент сайланади», – деди Қирғизистон раҳбари.

Президентнинг таъкидлашича, ҳозирги пайтда ҳукумат ҳузурида инвесторларни жалб қилиш ва уларнинг манфаатларини ҳимоя қилувчи Агентлик фаолият олиб бормоқда.

Мамлакатнинг янги конституцияси қабул қилингандан кейин, мазкур агентликнинг мақоми оширилади ва тўғридан-тўғри президентга бўйсунадиган миллий агентликка айлантирилади.

«Агар бирорта орган томонидан инвесторга босим ўтказилса агентлик унинг манфаатларини ҳимоя қилади. Буни шахсан ўзим назорат қиламан. Инвесторлар давлат билан 20-30 йилга битим имзолайди. Ҳатто ҳокимият ўзгарганда ҳам инвесторларнинг ўз фаолиятини давом эттириши кафолатланган бўлиши лозим. Давлат ўз тамойилларидан чекинмаслиги керак», – деди Жапаров.