Кўп квартирали уйларни рухсатсиз қурганлик учун фуқароларга базавий ҳисоблаш миқдорининг 400 баравари, мансабдор шахсларга эса 450 баравари миқдорида жарима белгиланмоқда. Бундай ҳуқуқбузарлик такроран содир этилганда, 3 йилдан 5 йилгача озодликдан маҳрум қилиш бўйича жиноий жавобгарлик белгилаш назарда тутилмоқда.

Бу «Бино ва иншоотларнинг зилзилабардошлиги ва сейсмик хавфсизлигини назорат қилишда давлат назорати ва бошқарувининг янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун лойиҳасида ўз аксини топмоқда. Мазкур қонун лойиҳаси Қонунчилик палатасидаги “Миллий тикланиш” демократик партияси фракциясининг йиғилишида қизғин муҳокама қилинди.  

Қайд этилганидек, махсус ишчи гуруҳ томонидан 2017-2024 йилларда қурилган ва қурилаётган 11 минг 834 та кўп қаватли уйларнинг сейсмик ҳолати ўрганилганда, уларнинг айримлари зилзилага бардош бермаслиги, баъзиларида эса ноқонуний равишда қўшимча қават қурилгани аниқланган. Шунингдек, ўзбошимчалик билан бино-иншоотлар қуриш ҳамон давом этмоқда.  

2025 йил 1 июлдан ўзбошимчалик билан қурилган бино-иншоотларни Қурилиш ва уй-жой коммунал хўжалиги соҳасида назорат қилиш инспекциясидан рўйхатдан ўтказиш тўхтатилган бўлса ҳам, ноқонуний қурилишлар сони 213 тага ошгани аниқланди. Кўрилган чоралар натижасида 128 та кўп қаватли бино-иншоотда ноқонуний қурилиш қилингани аниқланиб, 58 таси белгиланган тартибда буздирилган, 52 та жиноят иши қўзғатилди.

Шу боис бундай ҳолатларнинг олдини олиш мақсадида ишлаб чиқилган қонун лойиҳаси билан бу борадаги жавобгарлик янада кучайтирилмоқда.

<iframe width="560" height="315" src="https://www.youtube.com/embed/qAwmc0NBZl0?si=a6aazx0MD_9RyUEf" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳтарама Комилова,  

Ойбек Давронов (видео),  

ЎзА