«Ўзбекистон темир йўллари» локомотив паркини янгилаш бўйича қатор самарали ишларни амалга ошириб келмоқда. Хусусан, 2004 йилдан буён Осиё Тараққиёт банки билан ҳамкорликда Хитойнинг Чоджоу ҳамда Далян электровоз ишлаб чиқариш заводларидан 49 та “Oʼzbekiston” серияли, замонавий юк ва йўловчи ташувчи локомотивлар харид қилган.

2018 йил xорижий ҳамкорлар билан ҳамкорликдаги яна бир лойиҳа доирасида Россиянинг электровоз ишлаб чиқариш заводида тайёрланган иккита уч секцияли 3ЭС5К «ЕРМАК» электровозини олиб келган эди. Ушбу ҳамкорлик доирасида яна бешта 3 секцияли «ЕРМАК» электровозини олиш бўйича шартнома имзоланганди.

Бугун ана шу электровозларнинг иккитаси олиб келинди. Йил охирига қадар яна учта электровоз олиб келиниши кутилмоқда.

«Ўзбекистон темир йўллари» матбуот хизматидан маълум қилишларича, ушбу электровозлар олдингилардан фарқли жиҳати, унинг тортиш кучининг барча тизимлари электрон бошқарувга ўтказилганида экан. Шунингдек, тоғ шароитида ҳам оғир юк поездларни тортишга мўлжалланган.