Республикамизда иқлим шароитининг ўзгариб бориши, қишлоқ хўжалиги экинларини етиштиришда турли экстремал шароитларни юзага келтирмоқда. Натижада экинлар уруғини ривожлантириш бирмунча машаққатли кечмоқда. Бунда уруғчиликни ривожлантириш маркази томонидан бир қатoр самарали ишлар амалга оширилмоқда. Жумладан, авваллари ғаллачиликдан ўртача 25-30 центнер ҳосил олинган бўлса, сўнгги йилларда бу кўрсаткич 58-65 центнерни ташкил этмоқда.

Ўзбекистон Республикаси Қишлоқ хўжалиги вазирлиги ҳузуридаги Уруғчиликни ривожлантириш маркази томонидан 2022 йил баҳорида дала майдонларининг яроқлилик даражаси ўрганилди. Унга кўра, 77,8 минг гектар ер майдонлари яроқли деб топилган. Ушбу майдон учун 270 минг тоннадан ортиқ уруғлик дон жамғарилган.

Соҳа мутахассисларининг дастлабки таҳлилларига кўра, Россия Федерациясининг Краснодар ўлкасидан П.Лукяненко номидаги Дон миллий маркази селекциясига мансуб уруғлар республикамиз тупроқ-иқлим шароитига мос, табиатнинг турли стресс омилларига чидамли эканлиги айтилмоқда. Серҳосил буғдой навларининг юқори авлодли уруғликлари ҳисобига бошоқли дон экинларидан юқори ва барқарор ҳосил етиштириш имкониятини бермоқда. Марказ 1997 йилдан буён дунёнинг машҳур селекционер олимлари билан ҳамкорлик алоқаларини ўрнатган. Улар иштирокида ҳар йили муассасанинг 25-30 та янги селекцион нав ва линиялари синовдан ўтказилади. Маҳаллий шароитда синовдан ўтказилади.

Республика ҳудудларининг иқлим шароити ва об-ҳавонинг ҳар қандай кўринишига чидамли Россия селекциясига мансуб эртапишар, юқори ҳосилли буғдой навларидан 20 минг тонна уруғлик олиб келинди. Жиззах вилоятидаги «Кентекс» МЧЖ агрокластери ҳомийлиги ҳисобига олиб келинган уруғлар республика бўйлаб тарқатилади.

Бугунги кунда Россия федерациясидан олиб келинган уруғлик донни белгиланган тартибда тозалаш, саралаш, дорилаш ва қадоқлаш тадбирлари олиб борилаётир.

Маълумот ўрнида, импорт қилинган уруғлар эвазига Ўзбекистон шароитида ҳосилдорлик 10-15 фоизга ошиши кутилмоқда. 


Д.Маматова, ЎзА