Россия Мудофаа вазирлиги 27-Марказий илмий-тадқиқот институти олимлари COVID-19 билан касалланган беморда коронавирус тўпланишини 16 марта камайтиришга қодир «КовБАД» биологик фаол қўшимчаси ишлаб чиқишди.

Бу ҳақда Россиянинг “Қизил юлдуз” («Красная звезда») нашри хабар қилган.

– Ўтказилган тажриба шуни кўрсатдики, «КовБАД» қўшимчаси овқатга қўшиб истеъмол қилингандан кейин иккинчи куни бурун-халқум йўлидаги вирус миқдори икки баробар, олтинчи куни эса вируснинг организмда йиғилиш даражаси 16 баробар камайган, - дейди радиация, кимёвий ва биологик мудофаа қўшинлари раҳбари генерал-лейтенант Игорь Кириллов.

Мулозимнинг қайд этишича, мудофаа тизими мутахассислари ишлаб чиққан мазкур биологик фаол қўшимча туфайли коронавирус инфекциясининг инсон организмига таъсири камаяди. Шу тариқа касаллик беморда оғир асоратсиз, енгил ўтади. Кирилловнинг сўзларига кўра, восита таркибидаги асосий ингридиентлар организмда вирусга қарши ҳимоя тизимини кучайтиради.

Роман БОНДАРЧУК, ЎзА