Россия Федерациясида COVID-19 билан касалланиш даражаси декабрь ойининг ўрталарида барқарорлашади, учинчи тўлқин давом этмоқда. Бу ҳақда “Лидер-Тиббиёт” тиббий марказининг бош шифокори, болалар юқумли касалликлари бўйича мутахассиси Евгений Тимаков “Москва-24” телеканалига берган интервьюсида маълум қилди.

– Касаллик даражаси яхши ҳолатда, аммо кейинчалик нима бўлишини аниқ айтиш қийин. Эҳтимол декабрь ойининг ўрталарида касаллик камайиши мумкин, – деган шифокор.  

 “Лидер-Тиббиёт” тиббиёт марказининг бош шифокори, шунингдек, прогноз қилинган кузги коронавирус билан боғлиқ вазият ёзда кузатилган кўрсаткичдан юқори бўлмаслигини таъкидлади.  

 “Aгар коронавирус инфекциясининг янги мутациялари кузатилмаса, яъни бизнинг иммунитетимизни четлаб ўтадиган жиддий штаммлар бўлмаса, келаси йил баҳорда касалликнинг мавсумий ўсиши кузатилади. Бу эса соғлиқни сақлаш тизимига унчалик қийинчилик туғдирмайди”, – дея қўшимча қилди Тимаков.  

 Россияда коронавирусга қарши кураш бўйича федерал тезкор штаб маълумотларига кўра, мамлакатда 7 миллиондан ортиқ киши инфекцияга чалинган, оқибатда 300 мингга яқин фуқаро вафот этган. Шу ўринда 6 ярим миллиондан зиёд фуқаро касалликдан батамом тузалган.