Россия яқин ўн йил ичида Ой юзасида атом электр станцияси барпо этишни режалаштирмоқда. Лойиҳа Россиянинг миллий ой дастури ҳамда Россия–Хитой қўшма илмий станциясини барқарор энергия билан таъминлашни мақсад қилган. Бу ҳақда Reuters агентлиги хабар берди.

“Роскосмос” маълум қилишича, Ойдаги АЭС қурилиши 2036 йилга қадар якунланиши режалаштирилган. У ой бўйлаб ҳаракатланувчи роверлар, илмий обсерватория ва халқаро ой илмий станциясининг инфратузилмасини электр энергияси билан таъминлайди. Лойиҳани амалга ошириш учун Лавочкин номидаги илмий-ишлаб чиқариш бирлашмаси билан шартнома тузилган.

Сўнгги йилларда Россия космик тадқиқотлар соҳасида АҚШ ва Хитойдан ортда қола бошлади. Хусусан, 2023 йилда “Луна-25” миссиясининг муваффақиятсиз якунланиши мамлакатнинг ойга оид режаларига салбий таъсир кўрсатган эди. Шу шароитда Ойда АЭС қуриш ташаббуси Россиянинг узоқ муддатли космик дастурларга ўтиш йўлидаги муҳим қадам сифатида баҳоланмоқда.

Расмий баёнотларда станциянинг ядровий экани тўғридан-тўғри айтилмаган бўлса-да, лойиҳада “Росатом” давлат корпорацияси ва Курчатов институти иштирок этаётгани атом технологияларидан фойдаланилишини кўрсатади.

<iframe width="560" height="315" src="https://www.youtube.com/embed/mNmIsq4SeAk?si=EzhDI0RjKC_9g5XY" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Анвархўжа Аҳмедов, ЎзА