Кеча Европа Иттифоқи доимий вакиллари Россияга қарши санкциянинг навбатдаги тўпламини маъқуллади. Бу ҳақда Европа Кенгашининг Брюсселдаги йиғилиши олдидан маълум қилинди.

– ЕИга аъзо барча давлатлар томонидан Россияга қарши 19-пакет санкциясини ёзма тасдиқлаш жараёни бошланди, – деди “Reuters” мухбирига  уюшмага раислик қилувчи мамлакат вакили. - Қаршилар бўлмаса, қарор эртага қабул қилинади.  

Дарвоқе, таклифга қарши давлатлар ҳам бор эди. Масалан, Словакия ва Австрия эътирозини қайтиб олгандан сўнг янги чеклов бир овоздан маъқулланган.  

РФ гази ва нефтига қўшимча чеклов киритишни ЕК сентябрь ойи ўрталарида тақдим этган: 2027 йил 1 январдан бошлаб Россиядан суюлтирилган табиий газ импорти тўлиқ тақиқланди.  

Рус энергия ресурслари билан айланма йўл, жумладан крипто валюта орқали савдо қилаётган учинчи давлатлардаги компанияларга ҳам санкция қўлланадиган бўлди. Ҳужжат тайёрланаётган пайт россияликларга туристик шенген визаси берилишини чеклаш ҳам муҳокама қилинди. Бинобарин, якуний рўйхатга визага оид чеклов киритилмади.  

АҚШ Молия вазирлиги йирик нефть компаниялари –“Роснефть” ва “Лукойл”га қарши кенг кўламли санкция жорий этгани ҳақида хабар берди. Бу қарор Россия Украинага қарши урушни тугатиш бўйича жиддий муносабат билдирмаётгани сабаб қабул қилингани айтилмоқда.

– Президент Путин урушни тугатишдан бош тортганини ҳисобга олган ҳолда, АҚШ Молия вазирлиги Кремль ҳарбий машинасини молиялаштираётган икки йирик нефть компаниясига қарши санкция жорий этмоқда, –деган молия вазири Скотт Бессент. - Америкадаги активи музлатиладиган бу компаниялар билан янги шартнома тузиш тақиқланади.  

Худди шундай санкцияни бир ҳафта олдин Буюк Британия ҳам эълон қилган. Шунингдек, жорий йил Буюк Британия ва АҚШ “Газпром нефть” ва “Сургутнефтегаз” компанияларига ҳам чеклов қўллаган.  

АҚШ Президентининг сўзларига кўра, агар Путин Украинага қарши урушни тугатишга рози бўлса, санкция тезда бекор қилиниши мумкин.  

<iframe width="560" height="315" src="https://www.youtube.com/embed/u5lEnvQJPwY?si=CZh5UVwrBJIyJHbz" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА