20 mart kuni Xitoy Raisi Si Szinpinning Prezident Vladimir Putinning taklifiga binoan Rossiyaga tashrifi boshlandi.

“TASS” agentligi xabariga ko‘ra, bu XXR rahbarining oliy lavozimga qayta saylanganidan keyin birinchi xorijiy safaridir.

Kecha yetakchilar yopiq eshiklar ortida suhbatlashgan bo‘lishsa, bugun Kremlda delegatsiyalar ishtirokida kengaytirilgan muzokaralar bo‘lib o‘tadi.  

Putin barcha zarur masalalarni do‘stona va norasmiy muhitda muhokama qilish niyatida ekanini qayd etdi.  

“Ukraina atrofidagi inqirozni hal qilish bo‘yicha takliflaringizni diqqat bilan ko‘rib chiqdik. Rossiya Xitoyning tinchlik tashabbuslarini hurmat qiladi”, dedi prezident.

Uning ta’kidlashicha, "Xitoy eng dolzarb xalqaro masalalarda adolatli va muvozanatli qarashlarga ega”.

Rossiya va Xitoyning birgalikda amalga oshiradigan ishlari ko‘p.  

“Bundan rosa o‘n yil oldin ham XXR Raisi sifatida ilk tashrif bilan Rossiyaga kelgan edingiz. Shu davr ichida ikki tomonlama munosabatlar faqat rivojlanishda davom etdi”, dedi Putin.

O‘z navbatida, Si Szinpin “Men davlat rahbari bo‘lib qayta saylanganimdan keyin birinchi xorijiy safar uchun Rossiyani tanlaganim bejiz emas, biz ikki tomonlama munosabatlarni yuksak qadrlaymiz”, deb qayd etdi.  

O‘zA