Вашингтондаги таҳлил маркази эксперти Самуэл Бендет DW нашрига берган интервьюсида, Украина энди Россиянинг муҳим энергетика ва саноат объектларига зарба бермоқда, деди. Бунга у Усть-Луга порти ва Брянск вилоятидаги нефть терминалига уюштирилган ҳужумларни мисол қилиб келтирган.

Шунингдек, Киев энди ҳарбий ҳаракатларни қўллаб-қувватлаётган инфратузилмаларни нишонга олаётганига урғу берган.  

Бендетт сўзларига кўра, икки йил давомида урушда дронлар роли кескин ўсган. Айниқса, камера орқали бошқариладиган дронларнинг сони ва имкониятлари ошган. Улар узоқроқ масофага уча олади, кўпроқ портловчи модда кўтаради ва радиоэлектрон кураш воситаларига нисбатан чидамлироқ бўлиб бормоқда.

Экспертнинг сўзларига кўра, бу урушда сунъий интеллект ва бошқа юқори технологияларни жорий қилиш бўйича тажрибалар олиб борилмоқда. Бу эса келажакда бир оператор бир вақтнинг ўзида бир нечта дронни бошқариши мумкинлигини англатади. Мутахассис шу тариқа дронлар “тўдаси”пайдо бўлишидан хавотир билдирмоқда.

Россия ўрта масофали дронлар ишлаб чиқаришда устунликка эга ва улар доимий равишда такомиллаштирилмоқда.

Украина эса узоқ масофали камикадзе-дронларишлаб чиқаришни йўлга қўйган. Бундай дронлар Россия ҳудудининг ичкари қисмигача етиб бориши мумкин. Бироқ улар катта ҳажмда ишлаб чиқарилмаяпти.

Россия эса Эронда ишлаб чиқарилган “Шаҳед” туридаги дронлардан фаол фойдаланмоқда ва сўнгги пайтларда айрим моделларни катта миқдорда ишлаб чиқаришга эътибор қаратган.

Украина 2026 йилда 1 миллионга яқин қисқа масофали дрон, шунингдек, ўрта ва узоқ масофага учадиган 10 минг дона дрон ишлаб чиқариш режасини эълон қилган. Россия ҳам ўз навбатида катта ҳажмда ишлаб чиқаришни йўлга қўйгани айтилмоқда.

Ҳарбий эксперт Самуэл Бендеттнинг хулосасига кўра, икки томон ҳам саноат ва технология соҳасида тезроқ мослашишга ҳаракат қилмоқда, шу боис жараён узоқ давом этадиган пойгага ўхшайди.   

<iframe width="640" height="420" src="https://www.youtube.com/embed/dgOPc4a97w0" title="Rossiya va Ukraina o‘rtasida dronlar poygasi tobora tezlashmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Салимжон Обиджонов (видео), ЎзА