Украинанинг Суми шаҳрига уюштирилган ракета ҳужумида 34 киши, жумладан икки нафар бола ҳалок бўлиб, 117 инсон яраланди. Бу воқеани Ғарбдаги иттифоқчилар кескин қораламоқда.

BBC ёзишича, кеча эрта тонг учирилган икки баллистик ракета давлат университети ва Конгресс маркази яқинида портлаган.

АҚШ Президенти Дональд Трамп ҳужумни “даҳшатли воқеа” дея таърифлаган бўлса, Германия Канцлери Фридрих Мерц РФни ҳарбий жиноят содир этишда айблади.

Йирик ҳужумга тайёрланаётгани айтилаётган Москва ҳозирча ҳолатга расмий изоҳ бермаган.

Трампнинг Украина бўйича махсус вакили, истеъфодаги генерал-лейтенант Кейт Келлог ҳужум ҳар қандай одоб чегарасини кесиб ўтганини айтди. Владимир Зеленский эса Трампни Украинага келиб, вайронагарчиликни ўз кўзи билан кўришга чақирди.

– Илтимос, ҳар қандай қарор, музокарадан олдин одамлар, аҳоли, жангчилар, касалхона ва черковлар, вайрон бўлган бинолар, қурбонларни кўриш учун келинг, – деган Украина етакчиси.

Франция Президенти Эммануэль Макрон РФни “инсон ҳаёти, халқаро ҳуқуқ ва Президент Трампнинг дипломатик саъй-ҳаракатини очиқдан-очиқ менсимаслик”да айблади.

Европа Комиссияси раҳбари Урсула фон дер Ляйен ҳужумни “ваҳшийлик” дея таърифлаб, шундай деди:

– Россия халқаро ҳуқуқни очиқдан-очиқ бузган ҳолда тажовузкор ҳаракат қилган ва шундай бўлиб қолади. Урушни тўхтатиш учун зудлик билан қатъий чоралар кўриш зарур. Европа Украина шартига кўра, қон тўкилиши тугаб, адолатли ва мустаҳкам тинчликка эришилгунга қадар ҳамкорлар билан алоқани ушлайди, Путинга кучли босимни давом эттиради.

Мусулмон Зиё, ЎзА