Украина Президенти Владимир Зеленский ҳозирги жанг шароитида Россия ўз режасини амалга оширишда қийналаётганини таъкидлаб, дипломатик музокара шу ҳафта давом этиши эҳтимоли сақланиб турганини маълум қилди. РФ расмийлари эса музокара Москва манфаатига мувофиқ, деб билса-да, ҳудудий келишмовчилик ҳамон мавжудлигини таъкидламоқда.

Зеленский фикрича, Россия режасини амалга оширишда жиддий тўсиққа учрамоқда, стратегик босқич эса мавжуд вазият билан тўлиқ мувофиқлашмаяпти. РФ армияси Донбасс чегарасида муваффақиятга эришган бўлса-да, Киев қўшини Запорожье вилоятида бир аҳоли манзилини қайтариб олган.

Украина раҳбари қўшимча баёнот ҳам берди: Шу ҳафтага мўлжалланган АҚШ воситачилигидаги тинчлик музокараси бекор қилинмаган, лекин жанг хавфи билан боғлиқ ҳолат сабаб, учрашув жойи ўзгариши мумкин.

Москва томонидан Донецк минтақасининг қолган 20 фоиз ҳудудини тортиб олиш талабини Украина рад этиб келяпти. Мазкур баёнот Украина ташқи сиёсатида дипломатик йўл билан тинчликка эришиш асосий тамойил ўлароқ танлаганини қайта тасдиқлайди.

Кремль матбуот котиби Дмитрий Песковга кўра, Россия Украина билан музокарани давом эттиришни ўз манфаатига мос деб билади ва дипломатик йўлни афзал кўради. Шунингдек, музокара масаласи ҳамон муҳим ва Россия можаро ҳал қилинишини истамоқда.

Россиянинг дипломатик позицияси икки томон ўртасидаги музокара жараёни ҳали долзарблигини исботлайди. Афсуски, ҳудудий келишмовчилик ҳал бўлмасдан вазиятга аниқ баҳо бериш қийин.

Халқаро нашрлар нима ёзяпти?

“Reuters” ва “Associated Press” ахборотига кўра, шу ҳафтага режалаштирилган Россия – Украина тинчлик музокараси яқинлашмоқда. Зеленский баёнотидан кейин ушбу нашрлар учрашув жойи Швейцария ёки Туркия бўлиши мумкинлигини ёзди.

Д.Ҳакимов, ЎзА