Россия ракеталари сабабли НАТО мудофаани кучайтиришга қарор қилди
НАТОга аъзо мамлакатлар мудофаа вазирларининг икки кунлик учрашуви видеоконференция кўринишида бўлиб ўтмоқда.
НАТОга аъзо давлатлар мудофаа вазирлари Россиянинг ракета салоҳияти ортиб бораётганини ва оқибатда альянс хавфсизлигига таҳдид ортаётганини муҳокама қилишди, деди Брюсселда ўтказилган матбуот анжуманида бош котиб Йэнс Столтенберг.
НАТОга аъзо мамлакатлар мудофаа вазирларининг икки кунлик учрашуви видеоконференция кўринишида бўлиб ўтмоқда.
Бош котиб Россиянинг ўз ҳарбий салоҳиятини модернизациялашни давом эттираётгани ва бу таҳдидли ва «масъулиятсизлик» эканини айтди.
“Ўтган йили Россиянинг SSC-8 ракетаси (НАТО классификацияси бўйича шундай аталади) ўрта ва яқин масофага учадиган ракеталарни тугатиш тўғрисидаги Шартномани йўққа чиқарди. Россиянинг ушбу ракеталари иккиламчи мақсад учун ҳам мўлжалланган, улар Европа шаҳарларига етиб бориши мумкин. Россия шунингдек, қитъалараро баллистик ракеталарини ҳам модернизациялаштирмоқда. Россияда гипертовушли глайдер пайдо бўлди”, деди Столтенберг.
Столтенбергнинг таъкидлашича, мудофаа вазирлари «сиёсий ва ҳарбий чораларнинг мувозанатлаштирилган пакетини» келишиб олишди. Шунингдек, ракетага қарши мудофаа тизимининг интеграциялашувини мустаҳкамлаш, разведка маълумотларини тўплаш ва ҳарбий машқларга тузатишлар киритиш бўйича ҳам бир тўхтамга келишган.
У бир нечта иттифоқчилар Patriot тизимини харид қилишини эълон қилганини ҳам айтиб ўтди. Бундан ташқари, улар бешинчи авлод қирувчи самолётларини яратиш учун инвестиция киритишга шартлашиб олишди, деди бош котиб.
Россия охирги йилларда ўзининг ғарбий чегараларида НАТОнинг ҳаддан ортиқ фаоллашиб кетаётганини таъкидлаб келади. Москванинг фикрича, альянс ташаббусларини тобора кенгайтириб бормоқда ва буни «Россия таҳдидини босиб туриш», деб атамоқда.