Россия Федерацияси Қишлоқ хўжалиги вазири ўринбосари Максим Боровой бошчилигидаги делегация 16 октябрь куни Жиззах вилоятининг Шароф Рашидов туманидаги “BMB-NRC Agrologistics” қўшма корхонасига ташриф буюрди.

Делегация таркибида Россия Қишлоқ хўжалиги вазирлигининг Ўзбекистондаги вакили Алексей Ульянов ҳамда “Россельхознадзор” департаменти раҳбари Вячеслав Семёнов борлиги Россия ҳукумати Ўзбекистон қишлоқ хўжалиги соҳаси билан ҳамкорликка жиддий эътибор қаратганини кўрсатади.

Жиззах вилояти ҳокимининг қишлоқ ва сув хўжалиги масалалари бўйича ўринбосари Зафар Рўзиев, “ВМВ HOLDING” таъсисчиси Азиз Маматқулов ва бош директор ўринбосари Сардорбек Розукулов ҳам Россиядан келган нуфузли меҳмонлар билан учрашувда иштирок этишди.

Ташрифнинг асосий мақсади замонавий агрологистика мажмуаси фаолияти билан яқиндан танишиш ҳамда Ўзбекистон ва Россия Федерацияси ўртасидаги экспорт-импорт алоқаларини кенгайтириш йўлларини муҳокама қилишдан иборат бўлди.

Делегация аъзолари мажмуанинг қишлоқ хўжалиги маҳсулотларини саралаш, қайта ишлаш, қадоқлаш ва сақлаш жараёнлари, божхона, банк ва фитосанитар ҳужжатларини “Ягона дарча” тамойили асосида расмийлаштириш, транспорт-логистика хизматлари билан яқиндан танишишди.

Қўшма корхона бош директори Алексей Белоус ҳам тақдимотда иштирок этди. Ташриф давомида томонлар мажмуанинг иш фаолиятини жадаллаштириш, экспорт-импорт ҳажмини ошириш ҳамда савдо-иқтисодий алоқаларни мустаҳкамлаш бўйича таклиф ва ташаббусларни муҳокама қилишди.

Натижада Ўзбекистондан Россияга заъфарон ва қайта ишланган қишлоқ хўжалиги маҳсулотлари экспортини ошириш ҳамда “Россельхознадзор” лабораториясининг фаолиятини такомиллаштириш юзасидан келишувларга эришилди.

Ушбу мулоқот Жиззах вилоятининг иқтисодий салоҳиятини кўрсатиш билан бирга Россия билан икки томонлама ҳамкорликни мустаҳкамлаш ва савдо-иқтисодий алоқаларни кенгайтириш учун муҳим асос бўлиб хизмат қилади.

А.Қаюмов, Ж.Ёрбеков (сурат), ЎзА