РФ ҳукумати аъзолари ва Марказий банк раҳбарияти иштирокида ўтказилган йиғилишда Россия президенти Владимир Путин глобал энергия бозори ва мамлакатнинг экспорт салоҳияти ҳақида баёнот берди.

Унинг таъкидлашича, Россия ҳеч қачон Европа бозорига нефть ва газ етказиб беришдан бош тортмаган. Агар Европа давлатлари сиёсий босимлардан холи ҳолда узоқ муддатли ва ўзаро манфаатли ҳамкорликни тиклашни истаса, Москва бунга тайёр.

Ҳозирда руслар Европадаги айрим ҳамкорларига, жумладан, Венгрия ва Словакияга энергия ресурсларини етказиб беришда давом этмоқда. Шу билан бирга, бошқа харидорлар билан ҳам экспорт ҳажмини ошириш масаласи кўриб чиқилмоқда.

Путин Яқин Шарқдаги вазият, хусусан, Эрон атрофидаги кескинлик ва стратегик аҳамиятга эга Ҳурмуз бўғозининг эҳтимолий ёпилиши жаҳон иқтисодиёти учун жиддий хавф туғдиришини ҳам қайд этди. Унинг сўзларига кўра, дунё нефть савдосининг қарийб учдан бир қисми айнан шу йўл орқали амалга оширилади. Агар бўғоз ёпилса, бу глобал инфляциянинг ошиши, ишлаб чиқариш занжирларининг издан чиқиши ва энергия нархларининг кескин кўтарилишига олиб келиши мумкин.

Экспертлар фикрича, агар минтақадаги кескинлик сақланиб қолса, Ҳурмуз бўғози орқали нефть етказиб бериш жараёнлари яқин ҳафталарда жиддий хавф остида қолиши мумкин. Бу эса халқаро бозорда янги нарх вазиятининг шаклланишига сабаб бўлиши эҳтимоли бор.

Ф.Яхшибоева, ЎзА