Португалия терма жамоасининг ҳужумчиси Криштиану Роналду ўзининг футболчилик фаолиятида жуда кўплаб рекордларни қайд этган. Кутилмаган ҳаракатлари билан мухлисларини ҳар доим ҳайратга солиб келган. Яқинда эса унинг яна бир рекордига гувоҳ бўлишимиз мумкин. Гап шундаки, сўнгги пайтларда унинг Араб давлатларининг бирида тўп суриши ҳақида гап-сўзлар тарқалмоқда.

Marca газетасининг ёзишича, ҳозир Роналду Қатарда кечаётган Жаҳон чемпионатида Португалия миллий терма жамоаси таркибида энг яхши натижаларни қайд этиш учун кураш олиб бормоқда. У жаҳон чемпионатини жуда омадли бошлади. Даставвал Гана (3:2) мағлуб этилди, кейин эса Уругвай (2:0) устидан ғалаба қозонилди ва муддатидан олдин гуруҳдан чиқиб кейинги босқичга йўл олди. Криштианунинг ўзи ҳам ганаликларга гол киритди.  

Роналду яқинда  «Манчестер Юнайтед» клуби билан кўнгилсиз ҳолатда шартномани бекор қилганди.  

Бир неча кун аввал эса CBS Sports  газетаси журналисти Бен Жейкобс  37 ёшли ҳужумчига йирик таклиф тушгани ҳақида ёзди. Журналистнинг ёзишича, португалиялик юлдуз Саудия Арабистонининг «Аль-Наср» клубидан уч йиллик муддат билан 225 миллион долларлик таклиф олган.  

Энди Marca газетаси ушбу хабарни анча кенгайтирилган тафсилотлари билан эълон қилди. Испан газетасининг хабарига кўра, Роналду Аль-Наср клуби билан шартнома тузишга жуда яқин турибди. Таъкидланишича, португалиялик тўптепар 2025 йилгача бўлган шартномани имзолайди, маоши эса ҳар мавсум учун 200 миллион еврони ташкил этади.  

«Криштиану қатъий қарорга келган. У спорт қадриятларининг пасайишини молиявий фойда билан қопламоқчи. Европада ҳеч бир ўйинчи «Аль-Наср» клуби таклиф этаётган миқдордаги шартномага яқин ҳам келмаган», – деб ёзмоқда испан газетаси.  

«Аль-Наср» ҳозирда Саудия Арабистони олий лигасида иккинчи ўринни эгаллаб турибди. Жамоага франциялик мутахассис Руди Гарсия мураббийлик қилмоқда.