УЕФА Ұлттар лигасының екінші турында Португалия құрамасы Швецияны сырт алаңда екі доп айырмасымен жеңіп үш ұпайға ие болды.

Кездесуде Португалия капитаны Криштиану Роналду өзінің құрама команда сапындағы 100 және 101 голын соғып Еуропа құрлығындағы алғашқы жүзден астам гол соққан футболшыға айналды. Ол ұлттық құрамалар сапындағы соғылған голдар саны бойынша әлем рекордын жаңартуға жақын. Бүгінгі таңда бұл рекорд Иран футбол аңызына айналған Али Даийге тиесілі. Али парсылар сапындағы өткізген кездесулерде қарсы команда қақпасына 109 гол соққан.

Кездесуден кейін Роналду өзінің тарихи нәтижеге қол жеткізгені жөнінде пікір білдіріп, «Осынау тарихи жеңістен шексіз қуаныштымын. Маған 100 гол соғуым жайлы айтқанда, мен бұл аздық етеді дегенмін... Португалия үшін 101 гол», деп жазған инстаграм парақшасында.