Роман-памфлетлар ва эпопея
Ҳикоя ва памфлетлардан иборат асарларни қўлга оларкансиз, уни ўқиб тугатмасдан китоб жавонига қўёлмайсиз.
Янги китоблар
Халқаро Чингиз Айтматов академиясининг академиги, таниқли ёзувчимиз Нурали Қобулнинг ўқувчилар қўлига кетма-кет етиб борган уч китоби – “Сукут суиқасди ёхуд Сталиндан Саддамгача”, “Суиқасддан сўнгги сукут ёхуд Чингизхондан Черчиллгача” ва “Тавқи лаънат тамғаси ёхуд Трумендан Трампу Таракийдан Туркманбошигача” роман-памфлетлари адабиётимизда шу жанрдаги яхлит асарлар бўлди.
Ҳикоя ва памфлетлардан иборат асарларни қўлга оларкансиз, уни ўқиб тугатмасдан китоб жавонига қўёлмайсиз. Ҳар бир ҳикоя ва памфлет ўқувчини ҳаяжону ҳайратга солади. Сиз ушбу китобларда кечган аср ва бугунги юз йиллик бошида инсоният тақдирини ҳал этган Сталину Рузвелт, Трумену Трамп, Черчилу Брежнев, Хрушчёву Горбачёв каби дунё дарғаларининг сиёсий ва шахсий ҳаётларининг қалам тегмаган қирраларини кашф этиб, улар ҳаёти ва фаолиятининг фалсафий ечимига шоҳид бўласиз.
“Сукут суиқасди ёхуд Сталиндан Саддамгача” асарининг жаҳон интернет тармоқларида эълон қилиниши туфайли китоб миллонлаб ўқувчиларга етиб борди.
Устоз ёзувчимиз билан бўлган суҳбатда англадикки, роман-памфлетларнинг навбатдаги “Дордан қочган даҳо”, “Супер жосус” ва “Супер жаллод”, “Давлат тўнтариши” каби жилдлари ҳам яқин кунларда ўқувчилар қўлига етиб боради.
Сиз бу сиёсий романларда шу пайтга қадар билмаганингиз муҳим тарихий воқеалар, тарихий шахслар ҳаётининг қабариқ қирралари ҳақида қизиқарли маълумотларга эга бўласиз ҳамда кечмиш давр фалсафасини англаб, бугунги кун ва келажакка ўзгача нигоҳ билан боқа бошлайсиз.
Шунингдек, муаллифнинг Турону Хуросонда ҳукм сурган Темурийлар салтанатига бағишланган кўп жилдли “Темурийлар” эпопеясининг ўн биринчи, ўн иккинчи ва ўн учинчи “Султон қаршисида шайтон”, “Аросат ва фалокат”, “Шайтон шамшири” китоблари ҳам нашрдан чиқди. Адабий жамоатчилик эпопеяни адабиётимизда катта воқеа сифатида баҳоламоқда. Эпопеянинг биринчи китоби “Буюк турон амири ёхуд ақл ва қилич” инглиз тилида “Амазон” интернет тармоғида эълон қилингач, жаҳон адабиёти ихлосмандлари эътиборини тортгани ҳам адабиётимизнинг катта ютуғидир.
Қаҳҳоржон ЙЎЛЧИЕВ,
филология фанлари бўйича фалсафа доктори.