2008 жылы Lehman Brothers банкінің күйреуін болжаған америкалық инвестор, «Бай әке, кедей әке» кітабының авторы Роберт Кийосаки жақын арада швейцариялық Credit Suisse банкінің банкротқа ұшырайды деп болжам жасады.

Бұл туралы ол Fox телеарнасындағы «Кавуто: жағалаудан жағалауға» атты ток-шоуында мәлімдеген.

Кийосакидің мәлімдемесі американдық Silicon Valley Bank (SVB) және Signature Bank банктері банкрот болғаннан кейін шыққаны, бүкіл әлем бойынша қаржы компанияларының баға белгілеулерінің құлдырауына әкелді. Бірнеше күннің ішінде олар нарықтық капиталдандырудан жалпы 465 млрд доллар жоғалтты.

Credit Suisse ұзақ уақыт бойы күрделі қаржылық проблемаларды бастан кешіріп келуде. Өткен жыл маусымда Credit Suisse болгариялық есірткі саудагерлерінің ақшасын жылыстатқаны үшін кінәлі деп танылған алғашқы ірі швейцариялық банк болды.

Швейцария банкі 2022 жылды 7,3 миллиард франк таза шығынмен аяқтады, бұл оның 2008 жылы әлемдік қаржы дағдарысы басталғаннан бергі ең нашар нәтиже.

Осы жылдар ішінде Credit Suisse-тің капиталдандыруы 95 пайызға төмендеді. Бүгінде банк соңғы жылдардағы қаржылық есептілікті жасауда «елеулі кемшіліктер» анықталғанын хабарлады және соңғы жылдары қаржылық есептілікке ішкі бақылау тиімді болмағанын мойындаған.