Қытайдың солтүстік-батысындағы Шыңжаң-Ұйғыр автономиялық ауданының әкімшілік орталығы — Үрімші қаласында «Шанхай ынтымақтастық ұйымына мүше мемлекеттердің БАҚ ынтымақтастығы форумы – 2025» өз жұмысын бастады.

Қытайдың жетекші басылымдарының бірі — «Жэньминь жибао» газеті және Шыңжаң-Ұйғыр автономиялық ауданының Халық үкіметі ұйымдастырып отыр. Оған ШЫҰ-ға мүше, байқаушы және диалог бойынша әріптес елдердің ақпарат саласына жауапты министрліктері мен ведомстволары, жетекші ақпарат агенттіктері мен ірі медиахолдингтер басшылары қатысуда.

Форумның ашылу рәсімінде Қытай Коммунистік партиясы Орталық комитеті Саяси бюросының мүшесі, Шыңжаң партия комитетінің хатшысы Ма Синжуй, «Жэньминь жибао» газетінің бас директоры Юй Шаолян және ШЫҰ бас хатшысының орынбасары Сухайл Хан қатысушыларды құттықтады.

Форумның негізгі баяндамашылары қатарында Өзбекстан Ұлттық ақпарат агенттігінің (ӨзА) бас директоры Абдусаид Кучимов сөз сөйледі. ӨзА басшысы өз баяндамасында Қытайдың Орталық Азия, атап айтқанда Өзбекстанмен соңғы жылдары жедел дамып келе жатқан әріптестігіне, соның ішінде ақпарат саласындағы ынтымақтастыққа тоқталды. Бұл байланыстардың нығаюында мемлекет басшылары арасындағы өзара сенім мен достық қатынастың шешуші рөл атқаратынын атап өтті.

А. Кучимов Шанхай ынтымақтастық ұйымының табысты қызметі жаһандық деңгейде мойындалып келе жатқанын айта келе, бұл үдерісте бұқаралық ақпарат құралдарына да үлкен жауапкершілік жүктелетінін және осы жолда бірлескен күш-жігерді үйлестірудің маңыздылығын атап өтті.

Сондай-ақ форумның алғашқы күні «Жэньминь жибао» және «Хуаньцю шибао» (Global Times) зерттеу орталығы дайындаған «Ортақ үйіміз – ШЫҰ елдерінің дамуы жөніндегі әлеуметтік сауалнама» есебі ұсынылды. Сауалнама нәтижесіне сәйкес, ШЫҰ кеңістігіндегі халықтар «Шанхай рухын» кеңінен қолдап, түрлі саладағы мемлекетаралық ынтымақтастықты тереңдетуге қызығушылық білдірген.

Жалпы алғанда, бұл зерттеу «Шанхай рухының» ШЫҰ-ға мүше елдердің халықтарын өңірлік ынтымақтастықты дамытуға ұмтылдырып, бұрынғыдай біріктіруші күш ретіндегі рөлін сақтап отырғанын көрсетті.

Форумда әлемдік БАҚ алдында тұрған өзекті міндеттер бойынша пікір алмасулар жалғасуда.

Ш. Исаев, ӨзА

 Үрімші қаласы, Қытай