Саудия Арабистони пойтахти Ар-Риёд шаҳрида давом этаётган VI Ислом бирдамлиги ўйинларида Ўзбекистон делегацияси ҳисобидаги медаллар 26 та олтин, 30 та кумуш ва 26 та бронзага етди.

Ўйинларнинг кечаги дастурида аёллар кураши бўйича 50 килограммгача вазн тоифасида мамлакатимиз шарафини ҳимоя қилган Актенге Кеунимжаева барча рақибларини енгиб, олтин медални қўлга киритди. Шунингдек, Шоҳида Аҳмедова ўз вазн тоифасида кумуш медаль билан тақдирланди.

Енгил атлетиканинг 100 метрга тўсиқлар оша югуриш беллашувларида Лидия Подсепкина маррага иккинчи бўлиб етиб келган бўлса, қиличбозликнинг сабля йўналишида Зуҳриддин Қодиров бронза медалига сазовор бўлди.

[gallery-26346]

Бугунга қадар мусобақада умумжамоа ҳисобида Туркия 68 та олтин, 42 та кумуш ва 30 та бронза медаль билан карвонбошилик қилаётган бўлса, Ўзбекистон делегацияси жами 82 та медалга эга чиқиб иккинчи ўриндан жой оган. Эронлик спортчилар 21 та олтин, 18 та кумуш, 25 та бронза медалига эга чиқиб, учинчи ўринда қайд этилди.  

Бугун, 20 ноябрь куни VI Ислом бирдамлиги ўйинларида вакилларимиз гандбол, енгил атлетика ва пара атлетика, эркин кураш, жиу житсу, туя пойгаси ва қиличбозлик каби спорт турлари бўйича чиқиш қилади.

Жавоҳир Тошхўжаев,  

Муҳаммад АМИН (сурат),  

ЎзА