Buyuk Britaniya Bosh vaziri Rishi Sunak Konservativ partiyaning parlament saylovidagi mag‘lubiyati ortidan iste’foga chiqish niyatini ma’lum qildi.

– Tez orada Qirol janoblari bilan uchrashib, unga mamlakat Bosh vaziri lavozimidan iste’foga chiqish taklifimni bildiraman, – dedi Sunak. – Mamlakat ahliga juda afsusda ekanimni aytmoqchiman. Men bu ishga bor kuchimni bag‘ishladim, lekin fuqarolar Britaniya hukumati o‘zgarishi kerakligi haqida aniq signal yubordi. Xalqning hukmi muhim va yagona qaror. Men g‘azab va umidsizlikni his etdim va bu yo‘qotish uchun javobgarlikni to‘liq o‘z zimmamga olaman.

Bosh vazir Konservativ partiya nomzodlari va xodimlaridan ham samarasiz sa’y-harakati uchun uzr so‘radi.

Sunak o‘z ishini sarhisob qilar ekan, Buyuk Britaniya kuchayganini ta’kidladi:

Mamlakatimiz 20 oy oldingiga qaraganda xavfsizroq va kuchliroq ekanligiga ishonaman. Hozir 2010 yilga qaraganda ancha obod, adolatli va barqarormiz.

Britaniya hukumati yetakchisi saylovda Leyboristlar partiyasi bilan birga g‘alaba qozongan raqibi Key Starmerga ham muvaffaqiyat tiladi.