Рио-де-Жанейро қаласында жергілікті қылмыстық топтарға қарсы жүргізілген полиция операциясы барысында 119 адам қаза тапты. Ал қалалық омбудсмен кеңсесі 132 адамның өлімі туралы хабарлады.

CNN Brasil дерегінше, Бразилия қауіпсіздік күштері операцияның екінші күні 58 адамның қаза болғанын, сондай-ақ орман аумағынан 61 адамның мәйіті табылғанын мәлімдеді. Бұдан бөлек, 10 кәмелетке толмаған жасөспірім ұсталып, 118 қару-жарақ тәркіленді.

Героин мен есірткі саудасымен айналысатын картельдерге қарсы операция 28 қазанда басталған. Оған 2500 полиция қызметкері, сонымен қатар бронетранспортерлер мен тікұшақтар жұмылдырылған. Қылмыстық топ мүшелері полицияның оқ жаудыруына дрондар арқылы жауап қайтарған.

Рио-де-Жанейро губернаторы Клаудио Кастро қалада соғыс жағдайы орнағанын мәлімдеді. Осыған байланысты мектептер мен қоғамдық көлік жұмысы тоқтатылды.