Үргеніш халықаралық әуежайын жаңғырту және басқару бойынша өткізілген тендердің жеңімпазы анықталды.

ӨР Көлік министрлігінің хабарлауынша, бұл жоба мемлекеттік-жекеменшік әріптестік (МЖӘ) негізінде жүзеге асырылады. Тендер қорытындысы бойынша Оңтүстік Кореяның Incheon International Airport Corporation (IIAC) компаниясы жеңімпаз деп танылды.

Жоба аясында жеке әріптес жолаушылар мен жүк терминалдарын салып, оларды басқарады, сонымен қатар жерүсті қызметтерін де атқарады. Ал мемлекеттік әріптес аэродром инфрақұрылымын – ұшу-қону жолағын, перронды салу және басқару жауапкершілігін өз мойнына алады. Келесі кезең – 19 жылдық концессиялық мерзімді қамтитын МЖӘ келісімшартын жасау болмақ.

IIAC – Оңтүстік Кореяның басты әуе қақпасы ғана емес, сондай-ақ Солтүстік-Шығыс Азиядағы ең ірі көлік хабтарының бірі. Бұл әуежай бірнеше мәрте әлемнің ең дамыған және ең тығыз жолаушы ағыны бар әуежайларының үздік ондығына енген. 2024 жылдың қорытындысы бойынша әуежай 70 миллион жолаушыға қызмет көрсеткен.

Үргеніш халықаралық әуежайын жаңғырту мен басқаруға арналған бұл мемлекеттік-жекеменшік әріптестік жобасы Uzbekistan Airports АҚ тарапынан Көлік министрлігі және Экономика мен қаржы министрлігімен бірлесіп жүзеге асырылып отыр.