Эронда кескинлик хавфли босқичга кирди. “Рейтер” ёзишича, Президент Масъуд Пезешкиён АҚШ томонидан бериладиган ҳар қандай ҳарбий зарба “кескин ва пушаймон қиладиган даражада жавоб” билан қарши олинишидан огоҳлантирди. Теҳрон ушбу баёнотни мамлакат бўйлаб давом этаётган норозилик ва ташқи босим асносида берди.

Ўтган ой иқтисодий норозилик ортидан бошланган намойиш тезда сиёсий тус олди ва бутун мамлакатни қамраб олди. Норасмий манбалар минглаб қурбонлар, ўн минглаб ҳибсга олинганлар ҳақида ёзмоқда. Ҳукумат эса тартибсизлик ортида АҚШ ва Исроил турганини даъво қилмоқда.

Агентлик вазиятни янада чигаллаштираётган жиҳат суд тизимининг кескин ишоралари эканини таъкидлаган: мамлакат адлия тизими вакиллари айрим намойишчилар “муҳораб” – давлат ва дин асосларига қарши чиқишда айбланиши, бу ўлим жазоси билан якунланиши мумкинлигини очиқ айтган. Бу ҳолат халқаро ҳамжамиятда жиддий хавотир уйғотяпти.

Трамп Эрон расмийларини очиқча танқид қилиб, “янги раҳбарият вақти келди” дея баёнот берди. Вашингтон минтақага ҳарбий ресурсларини кўчираркан, аниқ қадам борасида сукут сақламоқда.

Интернет чеклови, ахборот қамали ва хавфсизлик чораси кучайтирилиши норозиликни бироз босгандек. Курдлар яшайдиган ҳудудларда қарама-қаршилик давом этяпти.

Хуллас, Эрон икки босим оралиғида турибди. Ичкарида тартибсиз жамият, ташқарида кескинлашаётган глобал қарама-қаршилик. Биргина нотўғри қадам минтақани кенг кўламли инқироз томон етаклаши мумкин.

Мусулмон Зиё, ЎзА