Jizzax viloyatida “Xavfsiz va sog‘lom yurt” tezkor-profilaktik tadbirlari doirasida o‘tkazilayotgan nazorat va reydlar giyohvandlikka qarshi kurashda tizimli va uzluksiz yondashuv qanchalik muhim ekanini yana bir bor ko‘rsatdi.

Uch kun davomida Jizzax viloyati ichki ishlar boshqarmasi jamoat xavfsizligi xizmatining  yo‘l harakati xavfsizligi boshqarmasi hamda uning shahar, tuman bo‘limlari hamda hamkor tuzilmalar ishtirokida amalga oshirilgan tadbirlar davomida giyohvandlik bilan bog‘liq beshta jinoyat aniqlanib, tegishli tartibda hujjatlashtirildi. Raqamlar ko‘p ko‘rinmasligi mumkin, ammo qisqa vaqt ichida bunday holatlarning qayd etilgani muammoning qanchalik dolzarb ekanini ko‘rsatadi.

Joriy yilning 8 dekabr kuni Zafarobod tumani hududida o‘tkazilgan tekshiruvlar chog‘ida bu xavfning naqadar niqoblanayotgani yaqqol namoyon bo‘ldi. Farg‘ona viloyatida istiqomat qiluvchi mavsumiy ishchi boshqaruvidagi “Lasetti” rusumli avtomashina tekshirilganda, jami 4,7973 gramm “gashish” giyohvandlik moddasi aniqlandi. Moddaning bir qismi hatto sigareta yondirgichi tagiga maxfiy joylashtirilgani, bunday jinoyatlar tasodifiy emas, balki oldindan puxta o‘ylab qilinganini ko‘rsatadi. Holat yuzasidan jinoyat ishi qo‘zg‘atildi.

Reydlar faqat transport vositalari bilan cheklanib qolmadi. 10–11 dekabr kunlari Do‘stlik, Arnasoy va Mirzacho‘l tumanlaridagi fermer xo‘jaliklari hamda sug‘orish ariqlari atrofida o‘tkazilgan ko‘zdan kechirishlar davomida qarovsiz holda o‘sib turgan “kannabis” giyohvandlik o‘simliklari aniqlandi. Ayrim hududlarda 7 tupdan 57 tupgacha bo‘lgan o‘simliklar topilgani, nazorat susaygan joyda xavf tezda paydo bo‘lishini anglatadi. Barcha holatlar bo‘yicha hozirda tergovga qadar surishtiruv ishlari olib borilmoqda.

Muhim jihat shundaki, aniqlangan holatlarning aksariyati katta miqdorlar bilan bog‘liq emas. Biroq amaliyot shuni ko‘rsatadiki, aynan shunday “mayda” ko‘rinishidagi holatlar o‘z vaqtida bartaraf etilmasa, keng ko‘lamli muammoga aylanishi mumkin. Qarovsiz qolgan bir necha tup o‘simlik yoki grammlab modda — bu katta jinoyat zanjirining ilk bo‘g‘inidir.

Shu ma’noda, Jizzax viloyatida o‘tkazilayotgan tezkor-profilaktik tadbirlar faqat jinoyatni fosh etish bilan cheklanmay, uning ildiziga zarba berishga qaratilgan. Giyohvandlikka qarshi kurash doimiy nazorat, qonun ustuvorligi va aholi o‘rtasidagi profilaktik ishlar bilan uyg‘unlashgandagina samara beradi. “Xavfsiz va sog‘lom yurt” doirasidagi tadbirlar bugun Jizzax vohasining barcha hududlarida aynan shu tamoyil asosida izchil davom etmoqda.

Abdujalol Qayumov, O‘zA muxbiri