Пойтахтимиз Тошкент шаҳрида овқатланиш шохобчалари ва тадбиркорлик субъектларида карантин қоидаларига амал қилиш ҳолатлари қандай?

«Анжир» миллий таомлар кафесига борганимизда, тахминан кечки соат 19:00 эди. Хўрандалар кўп бўлгани боис, қизғин иш жараёни устидан чиқдик. Кафе ходимларининг аксарияти тиббий ниқоб таққан. Айрим ишчи-ходимлар, асосан, ошпазларнинг тиббий ниқоб тақмаганига ёки шунчаки иягига тушириб олганига гувоҳ бўлдик. Келганимиздан хабар топган кафе ходимларининг кўплари чаққонлик билан тиббий ниқобларини тақиб олишга, бир-бирларини зудлик билан огоҳлантиришга улгурди.

Кафе ходимларнинг коронавирус инфекциясига қарши профилактик эмлашдан ўтганлиги ҳолати ўрганилди. Мазкур тадбиркорлик субъектида 48 нафар ходим фаолият юритаётган бўлса, уларнинг 30 нафари коронавирусга қарши вакцина қабул қилган, 18 нафари эса вакцина олмаган.

КЕЙИНГИ МАНЗИЛ...

Кейинги манзилимиз «Корзинка» супермаркети бўлди. Ичкарига киришдан олдин харидорларнинг тана ҳарорати ўлчаниб, қўллари антисептик воситалар билан зарарсизлантирилмоқда. Ниқоб тақмаганларга тиббий ниқоб тақдим қилиниб, карантин қоидаларига риоя этиш талаб қилинмоқда.

Менежерларнинг айтишича, мазкур савдо объектида 100 нафар ходим ишлайди ва уларнинг деярли барчаси коронавирусга қарши вакцина қабул қилган. Аммо, ўша ернинг ўзида буни тасдиқловчи ҳужжатларни бизга тақдим этишолмади.

ТЎЙХОНАДА...

Рейд тадбири давомида “Yakkasaroy premium” МЧЖга қарашли «Яккасарой» тўйхонасида кўп сонли меҳмонлар иштирокида никоҳ кечаси ўтказилаётганининг гувоҳи бўлдик. Иш юритувчиларнинг сўзларига кўра, мазкур тўйда 200-250 нафар меҳмон иштирок этмоқда.

Барчамизга маълумки, коронавирус инфекцияси билан касалланиш хавфи, асосан, ёпиқ жойлардаги жамоавий тадбирларда юқори бўлади. Ана шуларни инобатга олиб, Республика махсус комиссиясининг 2021 йил 6 июлдаги баёнига мувофиқ, 1 августдан тўйхоналарда оилавий тантана, тўй, маърака ва маросимларни ўтказиш 50 кишидан кўп бўлмаган ҳамда санитария ва гигиена талабларига қатъий риоя этган ҳолда ўтказишга рухсат берилган.

Тадбиркорларга Республика махсус комиссияси томонидан қабул қилинган мазкур баёнларнинг мазмун-моҳияти тушунтирилди.

<iframe width="650" height="420" src="https://www.youtube.com/embed/o-AEFh3pVwM" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Моҳигул Қосимова, Ёқубжон Мелибоев (видео), ЎзА