Трейдерлар маълумоти ва юк ташиш йўналишлари таҳлилига кўра, Россиянинг Хитойга нефть экспорти ўсишда давом этмоқда ва февраль ойида янги рекорд даражани кўрсатади. Юк ташиш ҳажми кунига 2,07 миллион баррелга етиши кутиляпти. Бу январь ойидаги 1,7 миллион баррелдан анча кўп. Ўсиш даражаси мустақил нефтни қайта ишлаш заводлари томонидан амалга оширилаётган фаол харид ҳолати билан боғлиқ. Қолаверса, эндиликда Ҳиндистон сотиб олишни қисқартиргандан кейин, ХХР нефтни сезиларли даражада арзон нархда сотиб олмоқда.

"Reuters" нашри “Vortexa Analytics” агентлигига таяниб хабар беришича, Хитой 2025 йил ноябрда Ҳиндистон ўрнини эгаллаб, денгиз йўли орқали РФ нефтининг асосий харидорига айланди. Ғарб санкцияси ва АҚШ билан савдо битими бўйича музокара олиб бориш зарурати ортидан юзага келган босим Ҳиндистонни декабрь ойида Россиядан нефть импортини икки йиллик энг паст даражага туширишга мажбур қилди. Мазкур кўрсаткич февраль ойида кунига 1,159 миллион баррелгача пасайиши башорат қилинган.

С.Раҳимов, ЎзА