Qonunchilikka ko‘ra, tarkibida kuchli ta’sir qiluvchi va psixotrop moddalar, giyohvandlik vositalari mavjud bo‘lmagan, retsept bilan beriladigan dori vositalarini retseptsiz sotish bazaviy hisoblash miqdorining besh baravaridan o‘n baravarigacha jarimaga sabab bo‘ladi.

Farmatsevtika tarmog‘ini rivojlantirish agentligi direktori maslahatchisi Muhabbat Ibragimovaning so‘zlariga ko‘ra, tarkibida kuchli ta’sir qiluvchi moddalar mavjud bo‘lgan dori vositalarni retseptsiz sotish esa bazaviy hisoblashning uch yuz baravari miqdorida jarima, ikki yil axloq tuzatish ishlari yoki uch yillik qamoq jazosiga sabab bo‘ladi. 

"Dorixonalar muntazam ravishda bunday qonunbuzarlikni sodir etib kelgan taqdirda, bu holat litsenziya talablari va shartlarining qo‘pol ravishda buzilishi hisoblanib, litsenziyaning amal qilishi belgilangan tartibda to‘xtatilishiga olib keladi. Dorixonalarga tadbirkorlik sub’ekti deb qaraladi. Holbuki, u yerda oq xalat kiygan mutaxassislar ishlaydi. Bu – ular barcha farmatsevtik talablarga to‘liq javob berishi kerak degani. Shuning uchun mamlakatimizdagi barcha dorixonalar tomonidan zarur dorixona amaliyoti talablari bajarilishini ta’minlash lozim", dedi Muhabbat Ibragimova.  

O‘zA