Миллий матбуот марказида Яйлов хўжалигини ривожлантириш уюшмаси томонидан «Республикада яйловлардан самарали фойдаланиш бўйича амалга оширилаётган чора-тадбирлар» мавзуида матбуот анжумани бўлиб ўтди.

Унда соҳадаги ривожланиш, жумладан, яйловлардан фойдаланиш самарадорлигини ошириш йўлида қилинган ишлар, экспорт, бандлик ва инвестиция масалалари хусусида маълумотлар берилди.

Бугунги кунда республикамизда 21,1 миллион гектар табиий яйловлар мавжуд. Ўз навбатида Президентимизнинг 2020 йил 2 сентябрдаги «Ўзбекистон Республикасида пиллачилик ва қоракўлчиликни янада ривожлантириш чора-тадбирлари тўғрисида»ги фармонига асосан яйловлардан самарали фойдаланишни ташкил этиш мақсадида республикадаги 17,4 миллион гектар яйлов майдонлари Ипакчилик ва жун саноатини ривожлантириш қўмитасининг доимий эгалигига ўтказиб берилди.

Мазкур фармон билан ушбу яйловларда қўй ва эчкилар бош сонини, маҳсулотлар етиштиришни кўпайтириш, қайта ишлаш, инвестиция лойиҳаларини амалга ошириш, экспорт ва янги иш ўринлари яратиш бўйича 2021 - 2025 йилларга мўлжалланган Ўзбекистон Республикасида қоракўлчиликни ривожлантиришнинг мақсадли параметрлари белгиланган.

Параметрларнинг бажарилишини таъминлаш мақсадида 55 та қоракўлчилик кластери ташкил этилган бўлиб, уларга яйлов ер майдонлари бириктирилган ҳамда кластерлар томонидан бугунги кунда 5 минг 472 та хўжалик юритувчи субъектларга ижарага берилган ҳолда кооперация алоқалари ўрнатилган.

Шунингдек, қўмита эгалигига ўтказилган яйлов майдонларида 39 та қоракўлчилик наслчилик МЧЖлар ва станциялари, 7 та наслчилик марказлари, 79 та каврак етиштириш ва уни экспорт қилиш билан шуғулланадиган хўжалик юритувчи субъектлар фаолият юритиб келмоқда.

Ташкил этилган қоракўлчилик кластерлари, наслчилик МЧЖлар, марказлар ва кавракчилик кластерлари тўлиқ «Яйлов хўжалигини ривожлантириш» уюшмасига аъзо этилиб, ушбу хўжалик юритувчи субъектларда жами 2,5 миллион бош қўй парваришланмоқда.

Жорий йилда мавжуд қоракўлчилик ва кавракчилик кластерлари томонидан жами 43 та инвестицион лойиҳа ишга туширилиши натижасида 32,3 миллион АҚШ доллари миқдорида инвестиция маблағлари ўзлаштирилди.

Бандлик масаласида 2022 йилда жами 93,3 минг нафар доимий ва мавсумий иш ўринлари яратилади. Жумладан, январь-ноябрь ойларида қоракўлчилик ва кавракчилик соҳаларида аҳолининг бандлиги 82,6 минг нафарга етказилди.

Яйловлар ҳолатини яхшилаш ва чўл-яйлов ўсимликлари уруғчилиги йўналишида 2 та илмий муассаса фаолият юритиб келмоқда. Жумладан, Бухоро чўл-яйлов ўсимликлари уруғчилиги маркази томонидан 2020-2022 йилларда 6,8 минг гектар чўл-яйлов озуқабоп экинлар уруғчилик майдонлари ташкил этилиб, 8,4 минг гектарга етказилди. Қоракўлчилик ва чўл экологияси илмий-тадқиқот институти томонидан 200 гектар тажриба далалари ташкил этилиб, юқори навли 12 турдаги яйлов ўсимликларининг 200 тонна уруғлари етиштирилди.

Олимлар томонидан қоракўл қўй зотининг 13 та типи ҳамда чўл яйлов озуқабоп ўсимликларнинг 12 та нави яратилган.

Гулноза Бобоева, ЎзА