Namangan viloyati Chortoq tumanida yashovchi kasanachi Anorxon aya Imomaliyeva joriy yil bahorgi ipak qurti boqish mavsumida 1 quti ipak qurti urug‘ini parvarishlab, undan 61 kilogramm ho‘l pilla hosilini oldi.

Ma’lumki, Namangan viloyati Chortoq tumanida 3 ming 522 quti ipak qurti parvarishlanib, 204 tonna hosil olinishi ko‘zda tutilgan. Kuni kecha tajribali pillakor, "Mehnat shuhrati” ordeni sohibasi Anorxon aya Imomaliyeva parvarishlayotgan ipak qurtlari pilla o‘rashga kirgan edi. Bugun esa undan hosil olib ulgurdi.  

–Pilla boqishning zavqi boshqacha, –deydi Anorxon aya. –Shuning uchun ham 45 yildirki ipak qurtini boqish bilan shug‘ullanaman. Bu ishda menga bolalarim, kelin va nevaralarim yaqindan ko‘mak berishadi. Davlatimiz taraqqiyoti yo‘lida ozgina bo‘lsada o‘z mehnatimiz bilan hissa qo‘shayotganimizdan hursandman. Keyingi mavsumlarda ham pilla boqish maqsadidaman.  

Gulnoza Boboyeva, O‘zA