Аҳоли мурожаатларига ечим топиш мақсадида Республика ишчи гуруҳи Сирдарё вилоятида ўрганиш олиб борди. Бунда асосан йўл, сув, электр энергияси таъминоти ҳамда ижтимоий соҳа объектларининг ҳолатини яхшилаш каби масалаларга алоҳида эътибор қаратилди.

Жумладан, Ховос туманидаги Оқчангал ҳамда Ўзбекистон тўкинчилиги маҳаллалари аҳолисининг мурожаатларига асосан 31 км. ички йўлни таъмирлаш режа қилиб олинган эди, бугунги кунга қадар 26 км. таъмирланди. Бу ишлар ҳудуд аҳолисининг оғирини анча енгил қилди.  

Республика ишчи гуруҳининг ўрганишлари асосида Сардоба туманида ҳам ички йўллар шағаллаштирилмоқда. Бирлашган ва Файзлиобод маҳаллалари ҳудудидаги 2,5 км.га яқин ички йўлларга тош-шағал аралашмаси тўкилиб, махсус техникалар ёрдамида текисланди.  

Ўрганишлари мобайнида электр таъминотида ҳам қатор муаммолар борлиги кўзга ташланди. Аҳолининг мурожаатларига асосан ҳудудларга 2 дона трансформатор, 61 дона темир-бетон устунлар ўрнатилди ҳамда янги электр тармоғи тортилди.  

Оғир ҳудудлардаги ичимлик суви таъминотини яхшилаш борасида ҳам қатор ижобий ишлар амалга оширилди. Жумладан, Ховос туманининг олис Оқчангал маҳалласи аҳолисини тоза ичимлик суви билан таъминлаш мақсадида битта тик қудуқ қазилиб, иккитасида таъмирлаш ишлари амалга оширилмоқда.  

Бундан ташқари, Мирзаобод тумани Нурафшон маҳалласининг аҳолиси 35 йилдан буён сув таъминотидаги муаммолардан қийналиб келар эди. Республика ишчи гуруҳининг ўрганишлари натижасида ҳудудга бир дона тик қудуқ қазилиб, 6 км. ичимлик суви тармоғи тортилди. Шунингдек, бир дона тик қудуқда тозалаш ишлари амалга оширилди. Бунинг учун 1 млд. 594 млн. сўм маблағ ажратилган. Натижада маҳалладаги 142 та хўжалик тоза ичимлик суви билан таъминланади.  

Гулистон шаҳар аҳолиси йил сайин ортмоқда. Шуни инобатга олган ҳолда янги сув иншоотлари бунёд этилмоқда. Ҳудуднинг Янги ҳаёт маҳалласида қиймати 5 млрд. 605 млн. сўм бўлган 2 дона янги тик қудуқ, сув ҳавзаси ҳамда сув станцияси барпо этилмоқда. Айни кунда 400 метр чуқурликдан тоза ичимлик суви олинмоқда.  

Сирдарё туманининг Тинчлик маҳалласида ҳам қиймати 2 миллиард сўмдан зиёд бўлган сув иншооти қурилиши ниҳоясига етказилмоқда. Аҳолига 4 километрдан зиёд ичимлик суви тармоғи тортилди. Натижада 3600дан зиёд аҳолининг ичимлик сувига бўлган эҳтиёжи янада яхшиланди.  

Аҳолини ижтимоий муҳофаза қилиш, унинг бандлигини таъминлаш давлатимиз сиёсатининг энг устувор йўналишларидан биридир. Ховос туманида истиқомат қилувчи Гулнора Бекқулова ҳам банкдан олган имтиёзли 25 млн. сўм кредити эвазига томорқасидан 6 сотихлик иссиқхона ташкил этди. Натижада ўзи ва оила аъзолари учун қўшимча даромад манбаи пайдо бўлди.  

Ховос туманидаги ёш тадбиркорлардан бири Бекмирза Эшбоев Оқчангал маҳалласида 6 млрд. сўм маблағ эвазига “Ёшлар меҳнат гузари”ни ташкил этди. Унга Республика ишчи гуруҳи ҳамда сектор раҳбарлари томонидан жой ажратишда, имтиёзли кредит олишда амалий ёрдам берилди. Гузарда айни кунда 40 нафар ҳудуд аҳолиси ишлаб келмоқда. Тўлиқ ишга тушгач, яна 100 нафардан зиёд аҳоли иш билан таъминланади.  

Бу каби ёш тадбиркорларни қўллаб-қувватлаш мақсадида Республика ишчи гуруҳи кўмагида 636 нафар фуқаро ва тадбиркорлик субъектларига тижорат банклари томонидан 22 млрд. сўм миқдорида кредитлар ажратилиши таъминланди.  

Шу билан бирга Мирзаобод, Сайхунобод, Ховос Боёвут, Сардоба, Оқолтин туманлари ва Янгиер, Гулистон шаҳарларидан 118 нафар фуқарога тадбиркорлик фаолиятини бошлаш мақсадида “Аҳолини тадбиркорликка жалб қилиш жамғарма”си маблағлари ҳисобидан субсидия асосида жами 1003,0 млн. сўмлик тикув машинаси, мотокультиваторлар, қандолатчилик учун маиший техникалар, қурилиш асбоб-ускуналари етказиб берилди.  

Республика ишчи гуруҳи ўрганишлари давомида аҳолидан ижтимоий соҳа объектларининг ҳолатини яхшилаш ҳамда қўшимча бинолар қуриш борасида кўплаб мурожаатлар бўлган эди.  

Гулистон шаҳрининг Намуна маҳалласида қуриб фойдаланишга топширилган “Golden kiy” номли болалар боғчаси ҳам мазкур ўрганишлар натижаси бўлди, дейишимиз мумкин. Мактабгача таълим ташкилоти 175 ўринга мўлжалланган бўлиб, ҳозирда 150 нафар бола тарбияланмоқда. Бино замонавий тарзда жиҳозланган. Боғчада 5 та гуруҳ бўлиб, 20 нафар ишчи ходим меҳнат қилишади.  

Гулистон шаҳрининг Нурафшон маҳалласи аҳолиси ҳам кўпайгани сабабли қўшимча мактабга эҳтиёж сезилди. Аҳоли мурожаатларига асосан ҳудуддаги 17-сонли мактаб ҳовлисидан қўшимча 240 ўринли бино қуриш ишлари амалга оширилмоқда.  

Мирзаобод туманидаги 2-сонли мактабгача таълим ташкилоти ҳам бир неча йиллардан буён таъмирталаб аҳволда эди. Қолаверса, бола сиғими камлигидан ҳудуд аҳолиси болалари учун боғча излаб овора эди. Қилинган мурожаатларга асосан ҳудудда 4 млрд. 252 млн. сўм маблағ эвазига 150 ўринли қўшимча бинонинг қуриш ва таъмирлаш ишлари бошлаб юборилди.  

Бу каби бунёдкорлик ишлари вилоятнинг барча ҳудудларида давом этмоқда.  

ЎзА